मंसिर ११ बझाङ । चैनपुर–ताक्लाकोट सडक भासिएका कारण यातायात अवरुद्ध भएको छ । तलकोट गाउँपालिका वडा नम्बर १, सुनिकोटमा सडक भासिए पछि बिहीबार बिहान देखि यातायात अवरुद्ध भएको हो । बझाङ सदरमुकामबाट करिब आठ किलोमिटर उत्तरमा रहेको पक्की सडक भासिए पछि जिल्लाका उत्तरी भेगमा चल्ने सवारी साधन ठप्प भएका छन् ।
पक्की सडक भासिए पछि नजिकै रहेका केही घरहरू पनि जोखिममा परेका छन् । ‘बर्खामा सडक अलिअलि दब्न थालेको भए पनि अहिले पूरै भासिएको सेती लोकमार्ग उत्तर खण्ड (चैनपुर–ताक्लाकोट) सडक कार्यालयका प्रमुख वीरेन्द्र यादवले बताए ।
आठ मिटर जति सडक भासिएको बताउदै उनले सतह भन्दा झन्डै सात मिटर तलबाट भासिएको देखिएको बताए । तत्काल अस्थायी रूपमा मर्मत गर्नका लागि काम सुरु गरिसकेको बताउँदै उनले शुक्रबार सम्म सडक सञ्चालनमा आउन सक्ने बताए ।
स्थायी रूपमा निर्माण गर्नका लागि ठूलो पर्खाल लगाउनु पर्ने भएकाले अध्ययन भइरहेको उनले बताए । बझाङलाई चीनको ताक्लाकोटसँग जोड्ने सडकको ४० किलोमिटर सम्म यातायात सञ्चालन हुने गरेको उनले बताए । तलकोट र साइपाल गाउँपालिकाका स्थानीय, साइपाल क्षेत्रमा आउने पर्यटकहरूले सडक प्रयोग गर्ने गरेको उनले बताए ।
