मंसिर ०७ बैतडी । बैतडीमा जिल्लाभरीका विद्यालय सहभागी हुने गरी स्थानीय तहस्तरीय राष्ट्रपति रनिङ्ग शिल्ड प्रतियोगिता आयोजना गरिने भएको छ ।
यहि पौष मसान्त सम्म स्थानीय तहस्तरीय राष्ट्रपति रनिङ्ग शिल्ड प्रतियोगिता सम्पन्न गरि सक्ने गरी प्रतियोगिता आयोजना गरिने भएको हो ।
जिल्ला खेलकुद विकास समितिले जिल्लाका १० वटै स्थानीय तहलाई पत्राचार गरिसकेको जिल्ला खेलकुद विकास समितिका प्रमुख तर्क राज जोशीले जानकारी गराए ।
आगामी माघ महिना भित्र जिल्लास्तरीय राष्ट्रपति रनिङ शिल्ड प्रतियोगिता आयोजना गरिने भएकाले पौष मसान्त सम्म स्थानीय तहस्तरीय राष्ट्रपति रनिङ शिल्ड प्रतियोगिता सम्पन्न गर्न भनिएको जोशीले बताए ।
जिल्ला खेलकुद विकास समितिको वार्षिक कार्ययोजना अनुसार आयाजना गर्न लागीएको प्रतियोगितालाई सफल पार्न आवश्यक तयारी तथा समन्वय समेत गरिएको जिल्ला खेलकुद विकास समितिले जनाएको छ ।
प्रत्येक स्थानीय तहबाट विद्यालयस्तरका विभिन्न खेल प्रतियोगिता मार्फत छनौट भएका खेलाडीहरूलाई जिल्ला स्तरीय प्रतिस्पर्धामा सहभागी गराइने उनले बताए ।
विद्यालयहरूबाट अन्तरपालिकागत, अन्तरस्थानीय तथा जिल्लास्तरका छनौटका आधारमा उत्कृष्ट खेलाडीलाई जिलास्तरको राष्ट्रपति रनिङ्ग शिल्ड प्रतियोगितामा प्रतिस्पर्धा गराइने जोशीले जानकारी गराए ।
जिल्लाका सबै स्थानीय तहले आफ्नो स्थानीय तह अन्तर्गतका विद्यार्थी अनिवार्य रूपमा सहभागी हुने गरि व्यवस्थापन गर्न र विद्यालयलाई समयमै टिम गठन, खेलाडी छनौट तथा आवश्यक कागजात तयार गर्न अनुरोध गरिएको उनले बताए ।
खेल समन्वय तथा व्यवस्थापनका लागि सम्बन्धित स्थानीय तह, विद्यालय प्रशासन र जिल्ला खेलकुद विकास समितिबीच निरन्तर समन्वय हुने उनले बताए । प्रतियोगितामा एथलेटिक्स, कबड्डी, भलिबल, मार्शल आर्टसहित विभिन्न विधामा प्रतिस्पर्धा हुने जोशीले बताए ।
प्रतियोगिता सम्पन्न भएपछि विद्यालयहरूले खेलाडीहरूको नामावली, विवरण, तथा फोटो सहितको प्रतिवेदन निर्धारित ढाँचामा जिल्ला खेलकुद विकास समितिको कार्यालयमा पेश गर्नु पर्ने उनले बताए ।
प्रतियोगिताबाट छनौट भएका उत्कृष्ट खेलाडीहरूले आगामी जिल्लास्तरीय राष्ट्रपति रनिङ्ग शिल्ड प्रतियोगितामा प्रतिनिधित्व गर्ने उनले बताए ।
