कार्तिक २८ अछाम । केही वर्ष अघिसम्म अछामका गाउँगाउँमा प्राविधिक शिक्षा विस्तारको उत्साह देखिए पनि हाल अधिकांश विद्यालयमा प्राविधिक पढाइ बन्द भएको छ ।
सीटीईभीटी,प्राविधिक शिक्षा तथा व्यावसायिक तालिम परिषद्बाट मान्यता प्राप्त गरेर जिल्लाका धेरै माध्यमिक विद्यालयले सिभिल इन्जिनियरिङ, कृषि र पशु विज्ञान जस्ता विषय पढाउन थालेका भए पनि हाल अधिकांश विद्यालयमा प्राविधिक पढाइ बन्द भएका हुन ।
कार्यक्रम सुरु भएको केही वर्ष गाउँमै बसेर सीपमूलक शिक्षा प्राप्त गर्ने विद्यार्थीको संख्या बढ्दै गइरहेको भए पनि अहिले धेरै विद्यालयमा ती कार्यक्रम बन्द भइसकेका छन् । कार्यक्रम सञ्चालन भइरहेका विद्यालयमा पनि विद्यार्थीको अभाव हुँदै गएको छ ।
सीटीईभीटीबाट मान्यता प्राप्त गरेर डिप्लोमा इन सिभिल इन्जिनियरिङ र डिप्लोमा इन जियोम्याट्रिक्स इन्जिनियरिङ पढाइरहेको साँफेबगर स्थित जनकल्याण माध्यामीक विद्यालयमा यही वर्षदेखि दुवै कार्यक्रम बन्द भएको प्राधानाध्यापक टेकबहादुर साउदले बताए ।
योग्य शिक्षकको अभाव र दुर्गम क्षेत्रमा प्राविधिक विषय पढाउन सक्ने प्रशिक्षक बस्न नचाहने भएकाले प्राविधिक कार्यक्रम बन्द गर्नुपरेको उनले बताए । प्राविधिक पढाइका लागि प्रयोगात्मक उपकरण, फिल्ड भ्रमण र तालिमका लागि सहयोग नपाउँदा विद्यालय समस्यामा परेको उनले बताए ।
साँफेबगर नगरपालिका भित्र रहेका सूर्यचन्द्र माध्यामीक विद्यालय, प्रभा धम्कोट माध्यामीक विद्यालय, महेन्द्र माध्यामीक विद्यालय र बेतालमाण्डौं माध्यामीक विद्यालयमा पनि प्राविधिक विषय पढाउन बन्द भएको साफेबगर नगरपालिकाका शिक्षा शाखा प्रमुख हरिश भट्टले जानकारी गराए ।
सीटीईभीटीबाट मान्यता प्राप्त गरेर डिप्लोमा इन सिभिल इन्जिनियरिङ पढाइरहेको मेल्लेख गाउँपालिका वडा नम्बर–६ शोडषामा रहेको नन्देश्वरी माध्यामीक विद्यालयले पनि कार्यक्रम बन्द गरेको छ ।
विद्यालयका प्रधानाध्यापक पृथ्वीबहादुर रावलले २०७६ सालमा प्राविधिक विषय पढाउन थालिएको विद्यालयमा प्रशिक्षक र विद्यार्थीको अभाव, स्रोत साधानको कमी लगायतका कारण दुई वर्ष अघि देखि प्राविधिक विषय पढाउन बन्द गरिएको बताए ।
पढाइ सुरु भएको पहिलो वर्ष २४ जना, दोस्रो वर्ष १७ जना, तेस्रो वर्ष ८ जना र चौथो वर्ष ६ जना विद्यार्थी भर्ना हुन आएको जानकारी गराउदै उनले २०८० सालको शैक्षिक सत्रसम्म पनि भर्ना लिइरहेको बताए । ६ जना विद्यार्थी मात्रै आएपछि कार्यक्रम बन्द भएको प्रधानाध्यापक रावलले बताए ।
दुर्गम क्षेत्रमा प्राविधिक विषय पढाउन सक्ने प्रशिक्षक बस्न इच्छुक नहुदाँ विद्यालयले कक्षा सञ्चालन गर्न नसकेको उनले बताए । जसका कारण प्राविधिक शिक्षा कार्यक्रमलाई दिगो बनाउनै नसक्ने अवस्था आएको उनले बताए । प्राविधिक विषय बढाउन बजेटको कमी अर्को समस्या भएको बताउदै उनले विद्यार्थी संख्यामा कमी हुनु अर्को कारण भएको बताए ।
गाउँका विद्यार्थी पढ्नका लागि सहर जाने हुँदा प्राविधिक कक्षामा भर्ना पर्याप्त नभएको बताउदै उनले जसले गर्दा विद्यालयहरूलाई कार्यक्रम सञ्चालन गर्न समस्या भएको बताए । प्रधानाध्यापक रावलले सीटीइभीटीको अनुगमनमा पनि कमजोरी देखिएको बताए ।
प्रारम्भिक चरणमा अनुमति र समर्थन दिने, त्यसपछि निरन्तर अनुगमन र सहयोग नहुँदा विद्यालयले धेरै समस्या बेहोर्नु परेको उनले बताए । प्रि–डिप्लोमा इन एग्रिकल्चर (प्लान्ट साइन्स) कार्यक्रम पढाइ हुने कमलबजार नगरपालिकाको जाल्पादेवी माध्यामीक विद्यालय ढाकुँ र तुर्माखाद गाउँपालिकाको कालिकेश्वरी माध्यामीक विद्यालयमा पनि बन्द भएको छ ।
कृषि विषयमा डिप्लोमा तह कार्यक्रम पढाइ हुने बान्नीगढी जयगढ गाउँपालिकाको सरस्वती माध्यामीक विद्यालयमा पनि बन्द भएको छ ।
