कार्तिक १० काठमाडौं । सुत्केरीको मृत्युपछि ललितपुरको इमाडोलमा रहेको किष्ट अस्पताल दिनभरी तनावग्रस्त बनेको छ । चिकित्सकको लाफरबाहीले सुत्केरीको मृत्यु भएको भन्दै मृतकका आफन्तले अस्पताल परिसरमा प्रदर्शन गरे पछि अस्पताल दिनभरी तनावग्रस्त बनेको हो ।
प्रदर्शनका क्रममा मृतकका आफन्तले अस्पतालको गेट तोडेर प्रदर्शन गर्न थालेपछि प्रहरीले लाठीचार्ज र अश्रुग्यास प्रहार गरेको छ । प्रदर्शनका क्रममा आक्रोशित भिडले अस्पतालमा ढुंगामुढा समेत गरेको छ । सम्भावित घटनालाई मध्यनजर राखेर अस्पताल परिसरमा सुरक्षाकर्मीको बाक्लो उपस्थिति रहेको छ ।
प्रदर्शनमा उत्रिएका मृतकका आफन्तले किष्ट अस्पताल बन्द गर, दोषीलाई कारबाही गर, मिनाश्री राईलाई न्याय दे लेखिएको प्लेकार्ड बोकेर उनीहरुले प्रदर्शन गरेका हुन् । प्रदर्शन उग्र बनेपछि प्रहरीले भिडलाई तितरवितर बनाउन केही राउन्ड आश्रुग्यास प्रहार र लाठीचार्ज गरेको थियो ।
सुत्केरी गराउने क्रममा खोटाङको हलेसी तुवाचुङ नगरपालिका वडा नम्बर ९ की ३४ वर्षीया मिनाश्री राईको शुक्रबार राति मृत्यु भएको थियो । चिकित्सकले दिएको समयमै सुत्केरी गराउन मिनाश्री शुक्रबार बिहान ९ बजे किष्ट अस्पताल पुगेकी भए पनि साँझ साढे ५ बजेसम्म पनि मिनाश्रीलाई सुत्केरी बेथा नलागेको उनका दाजु देवेन्द्र राईले बताए ।
राति साढे ९ बजेतिर एक्कासि इन्टर्नसिप गरिरहेका चिकित्सकले जबरजस्ती नर्मल डेलिभरी गराउँदा ब्लिडिङ नरोकिएर बहिनीको मृत्यु भएको देवेन्द्रले बताए । आफूहरूसँग सल्लाह नलिई आफू खुसी इन्टर्नसिप गरिरहेका डाक्टरले सिकाइका लागि आफ्नो बहिनीलाई नर्मल डेलिभरी गराउँदा मिनाश्रीले ज्यान गुमाउनु परेको उनले बताए ।
मिनाश्रीले गर्भवती अवस्थामा नियमित किष्ट अस्पतालमै चेकअप गराएको बताउदै उनले नियमित हेर्ने चिकित्सकको सल्लाह बमोजिम नै कात्तिक ९ गते डेलिभरी गराउन अस्पताल भर्ना भएको जानकारी गराए । बहिनी र बच्चाको स्वास्थ्य अवस्था राम्रै भएको बताउदै उनले बहिनी अस्पतालको चरम लाफरबाहीको सिकार बनेको बताए ।
ओभर ब्लिडिङकै कारण बहिनीको मृत्यु भएको बताउदै उनले झुक्याउन राति दुई पटकसम्म अस्पतालले अपरेसनको नाटक गरेर चरम लाफरबाही गरेको बताए । बहिनीको अपरेसनमा पनि सिनियर चिकित्सकहरू सहभागी नभएको उनको आरोप छ । उनले भने, ‘ओभर ब्लिडिङ भइरहेको छ ।
पहिलो अपरेसनमा पनि ब्लिडिङ रोकिएन । फेरि अर्को अपरेसन गर्नुपर्छ भने । बहिनीको ज्यान बच्छ भने गर्नुस् भन्यौं । अनेकौं प्रयास गरेर रातारात नै फ्रेस ब्लडको व्यवस्था पनि ग¥यौं । तर बहिनीलाई बचाउन सकेनौं ।’ बहिनीको मृत्युको कारण थाहा पाउन आफूहरूले अस्पताल प्रशासनसँग माग गर्दा त्यसको बदलामा प्रहरी प्रशासन लगाएर उल्टै दुःख दिएको उनले बताए ।
अस्पतालको तल्लो तहका कर्मचारीसँग वार्ताबाट केही निष्कर्ष ननिस्किएको बताउदै उनले माथिल्लो तहसँग वार्ता गर्न पाउनुपर्ने बताए । अस्पताल प्रशासनले ठूलो संख्यामा नेपाल प्रहरी र सशस्त्र प्रहरी खटाएर दमन गरेको उनले बताए ।
अस्पतालका निर्देशक र सुत्केरीलाई नियमित चेकअप गर्ने चिकित्सकले घटनाबारे यथार्थ जानकारी गराउनु पर्ने माग आफूहरूको रहेको देवेन्द्रले बताएका छन । अस्पताल प्रशासनले भने मृतकका आफन्तसँग यस विषयमा वार्ता भइरहेको जनाएको छ ।
