भदौ १३ धनगढी । कैलालीका युवा किसान गोकर्ण वलीले तराईको प्रचण्ड गर्मीमा पनि स्याउ खेती गरेर मनग्य आम्दानी गर्ने गरेका छन । लम्कीचुहा नगरपालिका वडा नम्बर–९ प्रतापपुरका किसान गोकर्ण वलीले प्रचण्ड गर्मीमा पनि स्याउ खेति गरेर मनग्य आम्दानी गर्ने गरेका हुन ।
सामन्यतया चिसो मौसम अर्थात हिमाली भेगमा मात्र फल्ने स्याउ वलीले ३ वटा सिजनमा लटरम्म फलाई सकेको देखेर अन्य युवा पनि अहिले स्याउ खेतीतर्फ आकर्षित भएका छन् । वलीले तीन बिघा जग्गामा व्यावसायिक रूपमा स्याउखेती गर्दै आएका छन् ।
विसं २०७८ साल माघ महिनामा भारतको हिमाचल प्रदेशको विलासपुरबाट स्याउका बिरुवा ल्याएर रोपेको बताउदै वलीले ३ वटा सिजनमा स्याउ फलाई सकेको जानकारी गराए ।
त्यसैगरी अर्का किसान हर्कबहादुर बिकले पनि यसबर्ष देखि गोदावरी नगरपालिका वडा नम्बर ७ टेकुला टोलमा ६ बिगाह जमिन भाडामा लिएर स्याउ खेति सुरु गरेका छन् ।
तराईको तापक्रममा फल्न सक्ने ११ सय बढी स्याउका बिरुवा रोपिएको उनले जानकारी गराए । चर्को गर्मीमा पनि फल्न सक्ने उन्नत प्रजातिको गोल्डेन, गाला, रोटा र फुजी प्रजातिको स्याउ लगाएको जानकारी गराउदै उनले तराईका क्षेत्रमा नौलो मानिएको स्याउ खेतीका लागि ६ लाख रुपैयाँ लगानी भइसकेको बताए ।
तराईमा पनि स्याउखेति उत्पादन हुने कुरा थाहा पाए पछि बिकले व्यावसायिक रुपमा स्याउखेति सुरु गरेको बताए । विकले स्याउ खेतिसँगै अम्बा, सुन्तला, कागती, टिमुर, शीतल चिनी, कागति, केरा र उन्नत जातका अन्य फलफूल लगाएको बताए ।
परम्परागत रुपमा रैथाने स्याउ उत्पादन गर्दै आएका किसानले अहिले आधुनिक प्रविधिबाट गर्मी ठाउँमा पनि नयाँ नयाँ प्रजातिका स्याउ लगाउन थालेका छन् । बिरुवा लगाएको दुई वर्षमै फल्ने हुँदा यस खेतीतर्फ आकर्षित भएको उनले बताए ।
स्याउखेती गर्दाको सुरुआतमा कृषि ज्ञान केन्द्र कैलालीले बिरुवा खरिद, सिँचाइ र तारबारका लागि अनुदान दिएको उनले बताए । कृषि ज्ञान केन्द्र कैलालीका सहायक प्रमुख टेकबहादुर बिष्टले कैलालीमा स्याउ खेति परिक्षणकोक्रममा रहेको बताए ।
उनले स्याउखेति गर्ने किसानलाई कृषि ज्ञान केन्द्र कैलालीले आवश्यक सहयोग गर्ने बताए । भारतबाट बर्षेनी करोडौंको स्याउ भित्रिने गरेको बताउदै उनले तराईमा पनि धेरै जग्गा भएका अरु किसानले पनि स्याउ खेती गरेमा कृषकले राम्रो आर्थिक लाभ लिन सक्ने बताए ।
स्याउकै लागि स्वदेशी रकम विदेशिने क्रम बन्द हुन सक्ने प्रवल सम्भावना देखिएको उनले बताए ।
