असार ०५ धनगढी । सुदूरपश्चिम प्रदेशमा सञ्चालनमा रहेका उद्योगहरुमा १ हजार ४ सय ५३ जनाले रोजगारी पाएका छन् । राष्ट्र बैंकले बिहीबार सार्वजनिक गरेको सुदूरपश्चिम प्रदेशको आर्थिक वर्ष ०८१÷०८२ को अर्धवार्षिक आर्थिक गतिविधि अध्ययन अनुसार सुदूरपश्चिम प्रदेशमा १ हजार ४ सय ५३ जनाले रोजगारी पाएका हुन ।
उद्योगहरुमा काम गर्ने महिला कामदार ९.०२ प्रतिशत र पुरुष ९०.९८ प्रतिशत रहेको अध्ययनले देखाएको छ । ती उद्योगमा काम गर्ने कुल कामदारमध्ये २१.९५ प्रतिशत विदेशी रहेको प्रतिवेदनले देखाएको छ ।े
प्रदेशमा राष्ट्र बैंकले खाने तेल, प्रशोधित दूध, गहुँको पिठो, चामल, चिनी, काठ, साबुन, इँटँ, रोजिन एन्ड टर्पेन्टाइन लगायतका उद्योग दर्ता रहेकोमा १३ वटा उद्योगबाट नियमित रुपमा तथ्यांक संकलन गरी अध्ययन गरिएको बताईएको छ ।
प्रशोधित दूधको उद्योग भने हाल सञ्चालनमा नरहेको हुँदा त्यसको विवरण प्रतिवेदनमा समावेश नगरिएको प्रतिवेदनमा उल्लेख गरिएको छ । उक्त अवधिमा प्रदेशका उद्योगको औसत क्षमता उपयोग ३५.७९ प्रतिशत देखिएको अध्ययनले देखाएको छ ।
तोरीको तेल र कंक्रिट उत्पादन गर्ने उद्योगको तुलनात्मक रुपमा बढी क्षमता उपयोग भएको देखिएको प्रतिबेदनमा उल्लेख गरिएको छ । चामल, गहुँको पिठो, चिनी, साबुन र इँटाको उत्पादन गर्ने उद्योगको औसत क्षमता उपयोग भएको छ भने रोजिन उत्पादन गर्ने उद्योगको क्षमता उपयोग शून्य रहेको छ ।
त्यसैगरी कच्चा पदार्थको कमी तथा खोटो संकलनमा भएको ढिलाइका कारण रोजिनको उत्पादन सुन्य रहेको छ । इँटाको उत्पादनमा १ सय ५० प्रतिशतले वृद्धि भएको छ भने अन्य सबै उद्योगको उत्पादनमा कमी आएको छ ।
उक्त उद्योगमा तोरीको तेल ८६.३३, चामल २१.३७, गहुँको पिठो ३९.८०, चिनीे ७.३४ र साबुनको ६६.८० प्रतिशतले उत्पादन ह्रास भएको अध्ययनले देखाएको छ ।
समीक्षा अवधिमा व्यापारिक गतिविधिमा आएको सुस्तता, कच्चा पदार्थको कमी, माग बढ्न नसक्नु लगायतका कारणले वस्तु उत्पादन गर्ने उद्योगहरुको क्षमता उपयोग घटेर उत्पादनमा ह्रास आएको प्रतिवेदनमा उल्लेख गरिएको छ ।
