चैत्र ११ चितवन । नेपालमा बाघको सङ्ख्या बढ्दै जाँदा बासस्थानको समस्या भएको छ । निकुञ्ज क्षेत्र, मध्यवर्ती क्षेत्र र अन्य वन क्षेत्र बाघको बासस्थान भए पनि बाघको सङ्ख्या बढ्न थालेपछि बासस्थानको समस्या भएको हो ।
चितवन राष्ट्रिय निकुञ्जले आयोजना गरेको अन्तरक्रिया कार्यक्रममा राष्ट्रिय निकुञ्ज तथा वन्यजन्तु संरक्षण विभागका वरिष्ठ इकोलोजिष्ट हरिभद्र आचार्यले बाघका लागि बासस्थान बढाउन आवश्यक रहेको बताए ।
विगत पाँच वर्षयता बाघको सङ्ख्या बढ्दै गएकाले बासस्थान पनि बढाउन आवश्यक रहेको उनले बताए । हिंस्रक बाघलाई खुला चिडियाघर बनाएर उनीहरूको संरक्षण गर्न आवश्यक भएको बताउदै उनले खुला चिडियाघर बनाएर त्यसलाई आयआर्जनसँग जोड्न सकिने बताए ।
नेपालमा बाघको सङ्ख्या सन् २००९ मा एक सय २१ रहेकोमा सन् २०२२ मा बढेर तीन सय ५५ पुगेको उनल जानकारी गराए । बाघको सङ्ख्या सन् २०१३ मा एक सय ९८ र सन् २०१८ मा दुई सय ५३ रहेको उनले जानकारी गराए ।
बाघको सङ्ख्या बढ्दै गर्दा बासस्थान क्षेत्र ९३ प्रतिशत घटेको आचार्यले बताए । एक सय वर्ष पहिले विश्वमा एक लाखको हाराहारीमा बाघ रहेकोमा अहिले यो सङ्ख्या घटेर पाँच हजार पुगेको उनले जानकारी गराए ।
पछिल्ला वर्षहरूमा बाघको संरक्षणमा ध्यान दिइएकाले यसको सङ्ख्या बढ्दै गएको उनले बताए । नेपालको वन क्षेत्रमा पाँच सयको हाराहारीमा बाघ राख्न सकिने बताउदै आचार्यले निकुञ्जको कोर क्षेत्रमा चार सय चार वटा बाघ राख्न सकिने बताए ।
बाघको मुख्य आहार मृग प्रजाति रहेकाले यसलाई समेत संरक्षण गर्न आवश्यक भएको उनले बताए । मृग प्रजातिसँगै बाँदर र घरपालुवा जनावार बाघको आहाराका रूपमा रहेको उनले जानकारी गराए ।
