पौष ०३ धनगढी । हरेक बर्ष अत्तरीयामा सञ्चालन हुँदै आएको सुदूरपश्चिम प्रादेशिक महोत्सव लगाउने विषयमा अन्यौलमा रहेको छ । महोत्सव आयोजना गर्दै आएको अत्तरिया उद्योग वाणिज्य संघका १० जना पदाधिकारीले राजीनामा दिए पछि महोत्सव लगाउने विषयमा अन्योलमा रहेको हो । गत वर्षको महोत्सवमा नक्कली टिकट ठेली प्रकरण बाहिरिए पछि केही दिन अघि समितिका उपाध्यक्ष सहित १० जनाले राजीनामा दिएका थिए ।

१५ जनाको समितिमा १० जनाले राजीनामा दिए पछि अहिले महोत्सव लगाउने विषयमा के गर्ने भन्ने अन्योल उत्पन्न भएको छ । समितिका अध्यक्ष कल्याण सिंह बोहराले ढिलो चाँडो भए पनि महोत्सव लगाउने बताएका छन । उनले समितिका पदाधिकारीले राजीनामा दिएकाले कसरी अगाडी बढ्ने भन्ने बारेमा कानुनी परामर्श गरिरहेको बताए । ‘महोत्सव लगाउने बताउदै उनले अहिले कानुनी परामर्श गरिरहेको बताए । समितिमा केही पदाधिकारी तथा सदस्यले राजीनामा दिएको हुनाले टुङ्गो नलागेको बताउदै उनले ढिलो चाँडो महोत्सव लाग्ने बताए ।

२÷४ दिन तलमाथि भए पनि महोत्सव लाग्ने उनले बताए । सबैको सहयोग भएमा महोत्सव सञ्चालन हुने बताउदै उनले महोत्सव व्यवसायी, कलाकार सबैका लागि भएको बताए । संघको महासचिव पदबाट राजीनामा दिएका शङ्कर खड्काले भने अहिलेको अत्तरिया उद्योग वाणिज्य संघ अवैध भएकाले महोत्सव लगाउन सम्भव नभएको बताए । ‘अहिले संस्था नै अवैधानिक छ । नवीकरण नै भएको छैन । अडिट गरिएको छैन । यी काम गर्न कार्यसमितिमा निर्णय गराउनु पर्ने त्यो भएको छैन । कसरी महोत्सव हुन्छ ?’ उनले भने ।

‘हामी महोत्सवको विरोधी होइनौ तर, अवैध तरिकाले महोत्सव हुनु हुँदैन ।’ उनले अहिले देखिएका समस्या समाधानका लागि पहिला नयाँ कार्यसमिति बनाउन आवश्यक रहेको बताए । उनले एक जना अध्यक्षले महोत्सव लगाउँछु भन्नु कल्पना बाहिरको कुरा भएको बताए । ‘अध्यक्षले महोत्सव लगाउन भन्दा पहिले समिति बनाउन आवश्यक छ । नयाँ तदर्थ समिति बनाएर हुन्छ या सर्वसम्मत समिति बनाएर महोत्सव लगाउन सहज हुन्छ’ उनले भने ।

विगतमा महोत्सवलाई मागिखाने भाँडो बनाएको गिरोह अहिले महोत्सव लगाउन सक्रिय भएको उनले बताए । महोत्सवका विषयमा व्यवसायीको आम भेला बोलाएर छलफल गर्ने तयारी गरिएको उनले बताए । १० जनाले राजीनामा दिएको अवस्थामा अध्यक्षले म एक्लै महोत्सव गर्छु भन्ने कुरा स्वीकार्य नहुने र, त्यो कानुन सम्मत पनि नहुने उनले बताए ।

उनले महोत्सव आयोजनाका लागि स्वीकृति लिन पनि कार्यसमितिको निर्णय र संस्था नवीकरणको कागजात आवश्यक पर्ने भएकाले अहिले स्वीकृति लिन सम्भव नभएको बताए । अत्तरियामा गत वर्ष आयोजना गरिएको महोत्सवमा नक्कली टिकट ठेली भेटिए पछि अदालतमा मुद्दा परेको थियो । अध्यक्षले अदालतले दोषी किटान गर्नु अघि हिनामिना भएको रकम संस्थालाई तिरेर मिलापत्र गराएर मुद्दा टुङ्गिए पनि समितिका ११ जनाले राजीनामा दिएका थिए । अत्तरियामा गत वर्ष पुस २६ गतेदेखि माघ ७ गते सम्म महोत्सव सञ्चालन गरिएको थियो ।