भदौ १२ धनगढी । कैलालीमा सम्बन्ध बिच्छेदका मुद्दा बढ्दै गएका छन । सम्बन्ध बिच्छेदका मुद्धाहरुको संख्या बढ्दै गएको जिल्ला अदालत कैलालीको तथ्याङ्कले देखाएको हो । जिल्ला अदालत कैलालीमा एक वर्षमा ७ सय ६८ जनाले सम्बन्ध विच्छेदका लागि मुद्दा दर्ता गराएको तथ्याङकले देखाएको छ ।
जिल्ला अदालत कैलालीमा गत आर्थिक वर्षमा कुल २ हजार पाँच सय ८२ वटा मुद्दा दर्ता भएकोमा तीमध्ये सबैभन्दा बढी सम्बन्ध विच्छेदका मुद्धा रहेका छन । बिगतमा निकै पीडा र समस्या पछि सम्बन्ध बिच्छेदका लागि अदालत सम्म पुग्ने गरेपनि पछिल्लो समय सामान्य विवादमै सम्बन्ध अन्त्य गर्ने निर्णयमा पुग्न थालेको कानुन ब्यवसायीहरुले बताएका छन । गत आर्थिक बर्षमा सम्बन्ध बिच्छेदका लागी २ सय १२ वटा मुद्दा पुरुषले मात्रै दर्ता गराएको अदालतको तथ्याङकले देखाएको छ ।
सम्बन्धविच्छेद गर्न अदालत जानेमा पुरुष भन्दा महिलाको संख्या दोब्बर देखिएको छ । जिल्ला अदालत कैलालीका प्रमुख न्यायाधीश दण्डपाणि लामिछानेले अदालतको तथ्याकं हेर्दा सम्बन्ध विच्छेदको समस्या विकराल बन्दै गएको बताए । सम्बन्ध विच्छेदका धेरै कारणहरु मध्ये एउटा कारण सम्पती भएको बताउदै उनले गरिबी र अभाव हुन्छ, त्यहाँ तनाव हुने भएकाले सम्बन्धमा दरार आउने गरेको बताए । मान्छेका इच्छा चाहानाहरू धेरै हुने गरेको र समाजले, अहिलेको परिवेशले लगाएको, खाएको देखे पछि अनुकरण गर्ने प्रवृत्तिले समस्या भएको उनले बताए ।
जसका कारण चाहाना पूरा गर्न दोस्रो विवाह गर्ने तथा फरक बाटो रोज्ने गरेको पाईएको उनले जानकारी गराए । न्यायाधीश लामिछानेले विवाह गरेर गएको घरमा महिलाले एक खालको अपेक्षा राख्ने तर आर्थिक अभावका कारण कतिपय अपेक्षाहरू पूरा नहुने भएकाले सम्बन्ध विच्चेद हुने गरेको बताए । चाहानाहरू पूरा नहुँदा अर्काेतिर पूरा हुने देखिए पछि सम्बन्ध तोड्ने गरिएको उनले जानकारी गराए ।
सम्बन्ध बिच्छेद सम्बन्धी मुद्धा बढ्दै जानथालेपछि बुद्धिजिवी र कानुन ब्यवसायीले चिन्ता ब्यक्त गरेका छन् । नेपाल बार एशोसिएशन कैलालीका पुर्व अध्यक्ष शिद्धराज ओझाले सम्बन्ध बिच्छेदका लागि अदालत पुग्नेहरु सबै पीडित नभएको बताए । सामान्य घर झगडाले अदालत सम्म पुग्ने गरेका घटनाहरु पनि भएको ओझाले जानकारी गराए । कतीपयलार्ई सम्झाएर पठाउने गरेको बताउदै ओझाले बिवाह गरेको दुई, तिन बर्ष नपुग्दै सामान्य झगडामा सम्बन्ध त्याग्न अदालत पुग्ने गरेको बताए ।
केही महिला तथा पुरुष वास्तविक पीडित भएर अदालत पुग्ने गरेको बताउदै उनले उनीहरुले न्याय पाउनुपर्ने बताए । सगैं जिउने र मर्ने कसम खाएका जोडीहरु दुई बर्षमै सम्बन्ध त्याग्न सम्म पुग्नु समाजका लागी राम्रो संकेत नभएको बताउदै उनले सामाजिक सञ्जालका कारण पनि धेरै सम्बन्धहरु बिग्रिने गरेको बताए । श्रीमान, श्रीमती बिच सामान्य बिवादले पनि अदालत धाउने प्रबृती बढ्दा बिवाह गरेको ४–५ बर्षमै जोडिहरु छुट्टिने क्रम बढेको उनले जानकारी गराए ।
