जेठ १४ धनगढी । कैलालीको अत्तरिया बजार महिनामा दुईदिन बन्द बन्द गर्न व्यापारीहरुले हस्ताक्षर अभियान सञ्चालन गरेका छन । अत्तरिया उद्योग वाणिज्य संघले महिनाको दुई दिन बन्द गर्दै आएकोमा केही व्यवसायीले अटेरी गर्न थाले पछि व्यवसायीहरु स्वयंले अभियान सञ्चालन गरि २ दिन बजार बन्द गर्न हस्ताक्षर अभियान सञलन गरेका हुन ।
संघले प्रत्येक महिनाको १५ र २८ गते दुई दिन बजार बन्द गर्ने निर्णय गरेको भए पनि केही व्यवसायीहरुले निर्णय नमानेर पसल खोल्ने गरेकाले सोमबार देखि जय केदार सपिङ सेन्टरका सञ्चालक व्यवसायी बिराज बिष्टको संयोजकत्वमा हस्ताक्षर अभियान सञ्चालन गरिएको हो । हस्ताक्षर अभियानमा ३ सय ५० जना व्यापारीको हस्ताक्षर संकलन गरिएको संयोजक बिष्टले बताए । उनले हाईवेमार्ग बजारमा व्यापार गरिरहेका व्यापारीहरुको पसलमै गएर हस्ताक्षर संकलन गरेको बताए ।
सबैको पसल सम्म पुग्न नसकिए पनि सबै व्यवसायीहरुले महिनाको १५ र २८ गते बजार बन्द गर्न सहमति जनाएको उनले बताए । उनले महिनाको दुई दिन बजार बन्द गरेर सहयोग गरिदिन पनि सबै व्यापारीहरुमा आग्रह गरेको बताए । अत्तरिया उद्योग वाणिज्य संघले पनि उक्त अभियानको समर्थन गरेको छ । संघका कोषाध्यक्ष हेमराज भण्डारीले संघले विगत देखी महिनाको दुई दिन बन्द गर्ने निर्णय गरेको बताए ।
उनले व्यापारीहरुसँगकै छलफलबाट महिनाको दुई दिन बन्द गर्ने निर्णय भएकोमा केही व्यवसायीहरुले अटेरी गर्दै आएको बताए । उनले संघको निर्णय अनुसार पसल बन्द हुनुपर्ने व्यापारीहरुको अभियानको उद्देश्य रहेकाले आफुहरुको समर्थन रहेको बताए ।
