बैशाख ३० धनगढी । प्रधानमन्त्री कृषि आधुनिकीकरण परियोजनामा आठ हजार ९ सय ३५ जना किसान आवद्ध भएका छन् । कैलालीमा परियोजनाद्वारा सञ्चालित गहुँ सुपरजोन,तेलहन जोन र धान जोन कार्यक्रममा आठ हजार नौ सय ३५ जना किसान आवद्ध भएका हुन् ।
गत आर्थिक बर्ष २०८० र चालुआर्थिक वर्ष २०८१ मा तीन वटै जोनमा चार हजार नौ सय १७ जना महिला र चार हजार १८ जना पुरुष गरी आठ हजार नौ सय ३५ जना किसान आवद्ध भएको प्रधानमन्त्री कृषि आधुनिकीकरण परियोजना, कार्यान्वयन एकाइ कैलालीका सूचना अधिकारी रीतु धामीले जानकारी गराईन ।
उनका अनुसार चालु आर्थिक बर्षमा सहकारी, कृषि समूह, कृषि उद्यमी, बीउ उत्पादन कम्पनी र समिति गरी तीन सय ३५ संस्था सूचीकृत भएका छन् । गहुँ सुपरजोन एक हजार पाँच सय हेक्टरबाट क्षेत्रफल विस्तार भएर हाल तीन हजार हेक्टर, तेलहन जोन पाँच सय हेक्टरबाट एक हजार पाँच सय हेक्टर र धान जोन पाँच सय हेक्टरबाट क्षेत्रफल विस्तार भएर आठ सय हेक्टर पुगेको उनले जानकारी गराईन ।
कार्यक्रम सञ्चालन भए पछि गहुँको उत्पादकत्व दुई दशमलव नौ मेट्रिक टन प्रतिहेक्टरबाट वृद्धि भएर हाल चार दशमलव चार, तोरीको उत्पादकत्व शून्य दशमलव नौ मेट्रिक टन प्रति हेक्टरबाट वृद्धि भएर एक दशमलव पाँच र धानको उत्पादकत्व तीन दशमलव ४७ बाट वृद्धि भएर पाँच दशमलव २७ मेट्रिक टन प्रतिहेक्टर पुगेको उनले जानकारी गराईन ।
गहुँ सुपरजोन कैलाली जिल्लाको कैलारी गाउँपालिका, गौरीगंगा र घोडाघोडी नगरपालिकाका विभिन्न १८ वटा वडामा,तेलहन जोन जानकी, जोशीपुर गाउँपालिका, भजनी, घोडाघोडी नगरपालिका र बर्दगोरिया गाउँपालिकाका विभिन्न २९ वटा वडा र धान जोन जोशीपुर गाउँपालिका, भजनी नगरपालिका र जानकी गाउँपालिकाका विभिन्न नौ वटा वडामा सञ्चालनमा रहेको सूचना अधिकारी धामीले जानकारी गराईन ।
चालु आर्थिक वर्षमा साना सिँचाइ अन्तरगत गहुँ सुपरजोन र धान जोनमा ५० प्रतिशत अनुदानमा एक सय ५६ वटा स्यालो ट्युवेल वितरण गरिएको जानकारी गराउदै उनले एक सय ४८ वटा जडानका लागि सम्झौता भएर काम भइरहेको जानकारी गराईन । त्यसैगरी सूचना अधिकारी धामीले परियोजनाले चैते धानको क्षेत्रफल विस्तार कार्यक्रम अन्तर्गत गत वर्ष ५० हेक्टरमा गरिएको चैते धान यस वर्ष एक सय २७ हेक्टरमा विस्तार गरेको जानकारी गराईन ।
लागत घटाएर कृषि आधुनिकीकरण गर्दै उत्पादकत्व बढाउन ५० प्रतिशत अनुदानमा बीउ, विषादी, कृषियन्त्र उपकरण वितरण गर्ने गरिएको उनले बताईन । साथै परियोजनाले प्राविधिक सहयोग समेत गर्ने गरेको उनले बताईन । कैलालीमा गहुँ सुपरजोन आथिक वर्ष २०७३÷७४, तेलहन जोन आथिक वष २०७४÷७५ र धान जोन आथिक वर्ष २०७८÷७९ मा सुरु भएको सूचना अधिकारी धामीले जानकारी गराईन ।
