बैशाख ३० धनगढी । सुदूरपश्चिम प्रदेशका मुख्यमन्त्री दीर्घबहादुर सोडारी जेठ ३ गते विश्वासको मत लिने भएका छन् । वैशाख ६ गते नियुक्त भएका मुख्यमन्त्री सोडारीले जेठ ४ गतेभित्र विश्वासको मत लिइसक्नु पर्ने कानुनी व्यवस्था रहेको छ । उनले सोही अनुसार जेठ ३ गते विश्वासको मत लिने भएका हुन् ।
यसअघि मुख्यमन्त्री सोडारीले वैशाख २१ गते विश्वासको मत लिन संसद्को बैठक पनि आह्वान गराएका थिए । नेकपा एमालेले तत्काल विश्वासको मत दिन नसकिने भन्दै अडानमा बसेपछि बैठक स्थगित गरिएको थियो । भोलिपल्ट २२ गते पुनः बैठक आह्वान गरियो भए पनि पुनः सल्लाह नगरी बैठक राखेको भन्दै एमाले रोकिदिए पछि संसद् बैठक अनिश्चित बन्न पुगेको थियो ।
मुख्यमन्त्री सोडारी प्रधानमन्त्री पुष्पकमल दाहाल प्रचण्डसँगको संवादपछि विश्वासको मत लिने तयारीमा लागेका बताइएको छ । एकीकृत समाजवादी सुदूरपश्चिम संसदीय दलका उपनेता प्रकाश रावलले शीर्ष नेताहरू एमाले अध्यक्ष केपी शर्मा ओली, प्रधानमन्त्री एवं माओवादी अध्यक्ष पुष्पकमल दाहाल प्रचण्ड र एकीकृत समाजवादीका अध्यक्ष माधव नेपालबिचको छलफल पछि प्रधानमन्त्रीले जेठ ३ गते विश्वासको मत लिने तयारी भई रहेको जानकारी गराए ।
नेकपा एमाले सुदूरपश्चिम संसदीय दलका उपनेता सन्तोष कुमारी शर्मा थापाले भने जेठ ३ गते विश्वासको मत लिनेबारे आफूहरूबिच कुनै छलफल नभएको जानकारी गराएकी छिन ।
