चैत्र १५ धनगढी । कैलालीको त्रिनगर सीमानाका भएर आउने ३८ जनामा कोरोना संक्रमणको पुष्टि भएको छ । चैतको दोस्रो साता बुधबार सम्म ३८ जनामा कोरोना संक्रमणको पुष्टि भएको हो । अधिकांश संक्रमितहरूमा सामान्य खालको रुघाखोकी र ज्वरोको लक्षण मात्र देखा परेको हेल्थ डेस्कका स्वास्थकर्मीहरूले जानकारी गराएका छन ।
नयाँ वर्ष नजिकिँदै गर्दा कामको खोजीमा भारत पसेका नेपालीहरु घर फर्कने क्रम बढन थालेसंगै कोरोनाको संक्रमण पनि बढ्दै गएको त्रिनगर हेल्थ डेस्कका प्रमुख गणेश साउदले जानकारी गराए । घर फर्कनेहरूको संख्या बढेसँगै दिनहुँ २÷३ जनामा कोरोना संक्रमण देखा पर्न थालेको उनले बताए । चैत महिनामा मात्रै बुधबार १४ गते सम्म भारतबाट घर फर्कने रुघाखोकी र ज्वरो आएका शंकास्पद व्यक्तिहरू मध्ये ९ सय ९० जनाको परीक्षण गर्दा ३८ जनामा कोरोना संक्मण देखा परेको डेस्क इन्चार्ज साउदले जानकारी गराए ।
पछिल्लो ६ महिनामा पहिलो संक्रमित पुस ३ गते देखा परेको जानकारी गराउदै उनी भारतको बेंग्लुरुबाट घर फर्केको साउदले बताए । त्यतिबेला भारतको दक्षिणी तथा पश्चिमी क्षेत्रका सहरहरू बेंग्लुरु, चेन्नई, हैदराबाद, सुरत लगायतमा कोरोना संक्रमण देखा परेको उनले बताए । तिनै सहरबाट फर्कनेहरूमा सुरुमा फाट्टफुट्ट संक्रमण देखा परेको भए पनि अहिले संक्रमण बढन थालेको उनले बताए । सुदूरपश्चिम प्रदेशका भारतसँग सीमा जोडिएका ४ वटा प्रमुख नाकाहरू कैलालीको त्रिनगर, कञ्चनपुरको गड्डाचौकी, बैतडीको झुलाघाट र दार्चुलाको पुलघाटमा कोरोनासँगै अन्य संक्रामक रोगहरुको परीक्षण हुने गरेको साउँदले बताए ।
रोगको लक्षण सामान्य रहेको, स्वदेश र विदेश जताततै कोरोना रोकथामको प्रभावकारी भ्याक्सिनेसन सम्पन्न हुनुले कोरोना संक्रमण देखिए पनि जोखिमपूर्ण नरहेको चिकित्सकहरूले बताएका छन । संक्रमण पुष्टि भएकाहरूले भने सतर्कता अपनाउनै पर्ने चिकित्सकले बताएका छन् । संक्रमण देखिएकाहरूलाई शारीरिक अवस्था जटिल भएमा आइसोलेसनमा रहन र स्वास्थ्य संस्थामा तत्काल सम्पर्क गर्न परामर्श दिने गरेको त्रिनगर हेल्थ डेस्कका इन्चार्ज साउदले जानकारी गराए ।
हालसम्म सीमामा देखा परेका संक्रमीतहरुमा कुनै नयाँ जोखिमपूर्ण भेरियन्ट फेला नपरेको केन्द्रीय प्रयोगशालामा गरिएको परीक्षणबाट समेत पुष्टि भएको उनले बताए । सुदूपश्चिम प्रदेश र कर्णाली प्रदेशका विभिन्न जिल्लाबाट कामको खोजीमा भारतका विभिन्न सहर पस्ने नेपालीहरू कैलालीको त्रिनगर गौरीफन्टा र कञ्चनपुरको गड्डाचौकी नाका भएर जाने आउने गरेका छन ।
