चैत्र ०९ धनगढी । सुदूरपश्चिम प्रदेशमा पछिल्ला हप्तामा कोरोना भाइरसको संक्रमण दर बढ्दो क्रम्मा रहेकोे छ । स्वास्थ्य निर्देशनालय दिपायलको तथ्यांक अनुसार पछिल्लो आठ दिनमा प्रदेशमा २१ जना कोरोना भाइरस संक्रमित भेटिए पछि बढ्दो क्रम्मा रहेको पाईएको हो । यसअघि गत फागुन १२ देखि ३० गते सम्मको १८ दिन २६ जनामा कोरोनाको संक्रमण देखिएको थियो । कोरोना संक्रमित बढ्दै गए पनि यो रोगको रोकथाम र निगरानीका लागि चासो दिएको देखिएको छैन । कोरोना भाइरसको संक्रमण बढेको भए पनि यसको रोकथाममा त्यति चासो नदेखाइएको गौरीफन्टा सीमानास्थित ‘हेल्थ डेस्क’का अहेब गणेश साउदले बताए ।

हेल्थ डेस्कमा एन्टिजेन विधिबाट कोरानाको नमुना जाँच हुने गरेको छ । देशका अरु नाकामा यो रोगका संक्रमित देखिएका छैनन्, सुदूरपश्चिमका नाकामा कोरोनाका बिरामी फेला परेको उनले बताए । कोरोनालाई नागरिकले सामान्य रुपमा लिँदा स्वास्थ्य सुरक्षाका मापदण्ड अपनाउनमा चासो नदिने गरेको पाइएको उनले बताए । धनगढीका स्थानीय लेखराज ओझाले कुनै समयमा गाउँमा हैजा, झाडापखाला लाग्दा रोगी नजिक जानु नहुने र रोगबाट जोगिन स्वस्थ्य व्यक्ति गाउँनै छोडेर सुरक्षित भएर बस्नुपर्ने अवस्था भएको बताउदै नागरिकले अहिले कोरोनालाई पनि सामान्य रोग जस्तै लिन थालेको हुन सक्ने बताए ।

पछिल्लो हप्तामा सुदूरपश्चिम प्रदेशका सीमा नाकाहुँदै भित्रिने नागरिक मध्ये शंकास्पद छ सय २० को एन्टिजेन विधिबाटको नमुना जाँच गरिएको बताइएको छ । सिकिस्त अवस्थाका कोरोना संक्रमित फेला नपरेको अहेब साउदले बताए । कोरोनाको लक्षण देखिएकालाई घरमै छुट्टै आइसोलेशनमा बस्न सल्लाह दिएर पठाउने गरेको उनले बताए । हेल्थ डेस्कमा कोरोनाको नमुना जाँच गर्ने कीट, लगायतका सामग्री अपर्याप्त भएको उनले बताए । प्रदेशमा विगतमा कोरोना संक्रमितको उपचार व्यवस्थापनका लागि बनाइएका क्वारेन्टाइन र होल्डिङ सेन्टर प्रयोग विहीन अवस्थामा रहेका छन् ।

गौरीफन्टा, गड्डाचौकी, लगायतका सीमा नाका हुँदै भित्रिने नागरिकमा कोरोना संक्रमण देखिने गरेको उनले बताए । गएको पुस अघिको आठ÷दश महिना शून्य रहेको कोरोना संक्रमण गत पुस महिना देखि पुनःदेखिन थालेको उनले बताए । हेल्थ डेस्कका कर्मचारीलाई गत साउन देखिको तलब परिश्रमिक समेत खान नपाएको साउदले बताए । तलब नपाउँदा कर्मचारीले पीडाबोध गरिरहेको बताउदै उनले हेल्थ डेस्कमा एन्टिजेन कीट, मास्क लगायतका सामग्री पनि पर्याप्त नहुँदा काम गर्ने मनोबल घटेको बताए । सेती प्रादेशिक अस्पताल धनगढीका मेडिकल सुपरिटेन्डेन्ट डा शेरबहादुर कमरले कोरोना संक्रमण रोकथामका लागि निरन्तर निगरानी भइरहेको बताए । उनले यो मौसममा भाइरलको समस्या बढ्ने भएकोले सबैले स्वास्थ्य सुरक्षाका मापदण्ड अपनाइ सचेतता अपनाउन जरुरी भएको बताए ।