फागुन ०३ धनगढी । कपिलवस्तुको शिवराज नगरपालिका वडा नम्बर–१ सुरही पुल नजिकै यात्रुवाहक बस दुर्घटना हुँदा ज्यान गुमाएका १० जनाको पहिचान खुलेको छ । कञ्चनपुरको भीमदत्त नगरपालिका वडा नम्बर–१ का २७ वर्षीय राहुलराम कामी, भीमदत्त नगरपालीका वडा नम्बर–४ का २४ वर्षीय उमेश भण्डारी, भीमदत्त नगरपालीका वडा नम्बर–१६ का सन्जु थापा र पुनर्वास नगरपालिका निवासी किसन भट्टको दुर्घटनास्थलमै मृत्यु भएको छ ।
भीमदत्त नगरपालिका बस्ने खगेश्वरी खाती, भीमदत्त नगरपालिका वडा नम्बर–२ बस्ने सुदीप भट्ट र पुनर्वास नगरपालिका वडा नम्बर–९ बिसफाँटा बस्ने बिमलादेवी भट्टको दुर्घटनामापरी मृत्यु भएको हो । त्यसैगरी रौतहट औराही–३ का ४६ वर्षीय नारायणबहादुर भण्डारी, सल्यान सैनिक हल ३ बस्ने कालिजंग गण गोरुसिंगे नेपाल आर्मीमा कार्यरत अर्जुनकुमार योगी र भारत उत्तरप्रदेश मुरदाबादका सकिल मुसलमानको मृत्यु भएको छ ।
बुधबार राति १ बजे महेन्द्रनगरबाट काठमाडौँ जाँदै गरेको सुनौलो महाकाली यातायातद्वारा सञ्चालित सुदूरपश्चिम प्रदेश ०२–००१ ख ००९८ नम्बरको बस सडकबाट दुई सय मिटर तल खसेर दुर्घटना हुदा उनीहरुको मृत्यु भएको हो । जिल्ला प्रहरी कार्यालय कपील्बस्तुका प्रहरी निरीक्षक नवरत्न पौडेलले दुर्घटनामा घाइते भएका ३० जना मध्ये नौ जनालाई बुटवल पठाइएको बताए । अन्य घाईतेको सञ्जीवनी र आधारभूत अस्पतालमा उपचार भइरहेको प्रहरी निरीक्षक पौडेलले जानकारी गराए ।
