पौष १३ धनगढी । सुदूरपश्चिम प्रदेश स्तरीय नृत्य र गायन विधाको प्रतियोगिता एसईई आइडल ३ को एक अडिसन कैलालीको अत्तरियामा सम्पन्न भएको छ । शुक्रबार अत्तरियामा रहेको दुर्गालक्ष्मी नमूना माध्यमिक विद्यालयमा आइडलको सत्रौँ अडिसन सम्पन्न भएको हो । नृत्य र गायन विधामा २७ जना विद्यार्थीहरुले सहभागिता जनाएको आयोजकले जानकारी गरएको छ । एसईई आइडल ३ सुदूरपश्चिम प्रदेशका ९ जिल्लाका ३० भन्दा बढी स्थानहरुमा अडिसनहरुमा आयोजना गरिने आयोजक संस्थाका प्रकाश छेडालले जानकारी गराए ।
यस वर्ष एसईई दिने विद्यार्थीहरुले अडिसनमा सहभागी हुन पाउने बताउदै उनले यस वर्ष पनि गत बर्ष जस्तै नृत्य र गायन प्रतिभाहरुले आफ्नो प्रतिभा प्रदर्शन गर्न पाउने बताए । असोज देखि फाल्गुण सम्म सुदूरपश्चिम प्रदेशका ९ वटै जिल्ला भरी अडिसन प्रतियोगिताहरु संचालन हुने बताउदै उनले नृत्य र गायन विधाका उत्कृष्ट ३०–३० जना प्रतिस्पर्धिहरुले २०८१ बैशाखमा हुने दोस्रो चरणमा प्रवेश पाउने बताए ।
दोस्रो चरणमा उत्कृष्ट हुने नृत्य र गायन विधाबाट १५–१५ जना प्रतिस्पर्धीहरुले २०८१ असार १ गते हुने फाईनलमा प्रवेश पाउने बताउदै उनले फाईनलबाट दुवै विधामा १–१ जना विजेता र १–१ जना उपविजेता बन्ने जानकारी गराए । दुवै विधाका विजेता र उप विजेताले क्रमशः ५०–५० हजार र २५–२५ हजार सहित कक्षा ११ र १२ मा पूर्ण छात्रवृत्ति पाउने उनले बताए । साथै दुवै विधाका उत्कृष्ट ५ भित्र पर्ने अन्य प्रतिस्पर्धिहरुले कक्षा ११–१२ मा आंशिक छात्रवृत्ति पाउने उनले जानकारी गराए ।
थप अडिसन स्थलहरुको खोजी भईरहेकोले प्रतियोगितामा सहभागी हुन ईच्छुक विद्यार्थी तथा विद्यालयहरुलाई सम्पर्क गर्न उनले अनुरोध गरेका छन । आयोजकले यस भन्दा पहिले पनि २ वटा संस्करणहरु आयोजना गरि सकेको बताएको छ । मुख्य प्रबर्द्धकका रुपमा प्रदेश युवा परिषद्, सुदूरपश्चिम प्रदेश रहेको एसईई आइडल ३ मा रेडिकल एकेडेमी लगायतका विभिन्न संघसंस्थाको पनि विशेष सहयोग रहेको उनले जानकारी गराए ।
