भदौ ३१ अछाम । अछामको रामारोशनमा हुने भनिएको अन्तर्राष्ट्रिय सम्मेलनमा भाग लिन जाँदै गरेका विभिन्न देशका ४० जना पर्यटकहरु अन्यौलमा परेका छन् । पर्यटकीय क्षेत्र रामारोशनमा हुने भनिएको अन्तर्राष्ट्रिय सम्मेलनको स्थानीय प्रशासनले आधिकारिकता खोजेपछि सम्मेलनमा भाग लिन जाँदै गरेका विभिन्न देशका ४० जना पर्यटकहरु अन्यौलमा परेका हुन् ।
स्थानीय प्रशासनले सम्मेलनको आधिकारिकता खोजेपछि कार्यक्रम हुने नहुनेमा पनि अन्यौलता सिर्जना भएको छ ।
रामारोशनमा गर्ने भनिएको कार्यक्रम आयोजक, सहभागी र समयका बारेमा प्रस्ट जानकारी नभएको बताइएको छ । स्थानीय प्रशासनले विभिन्न देशबाट आएकाहरूलाई अछामको प्रवेश नाकामा रोकिदिएको बताईएको छ । कार्यक्रम गर्नु अगाडि नै स्थान, सहभागी संख्या, देश, समय अवधिका बारेमा जानकारी गराउनु पर्ने भए पनि त्यस्तो नभएक कारण यस्तो समस्या देखिएको जिल्ला प्रशासन कार्यालय अछामले जनाएको छ ।
जिल्ला प्रशासन कार्यालय अछामले उक्त कार्यक्रमका सम्बन्धमा सुदूरपश्चिम प्रदेशको आन्तरिक मामिला तथा कानुन मन्त्रालयसँग विस्तृत विवरण माग गरे पनि कुनै जानकारी नआएको बताएको छ । प्रमुख जिल्ला अधिकारी शरदकुमार पोखरेलले अहिलेसम्म कुनै जानकारी नआएको बताए । स्थानीय प्रशासन र अछाम प्रहरीले विदेशीले रामारोशनमा गर्न लागेको कार्यक्रमको आधिकारिकता मात्रै खोजेको जानकारी गराएका छन । एक महिनाको अवधिमा विभिन्न देशका गरेर दुई हजार भन्दा बढी पर्यटक रामारोशन आउने बताइएको छ ।
रामारोशनमा आयोजना हुने कार्यक्रमका आयोजक, ट्राभल एजेन्सी लगायत विविध कुराको जानकारीका लागि गृह मन्त्रालयमा पत्र पठाइएको सुदूरपश्चिम प्रदेशका आन्तरिक मामिला तथा कानुन मन्त्रालयका निमित्त सचिव विश्वदीप वेस्राले जानकारी गराएका छन । गृह मन्त्रालयको निर्देशन अनुसार विदेशीलाई कार्यक्रम गर्न दिने वा नदिने भन्ने विषयमा टुङगो लाग्ने बतार्ईएको छ । रामारोशन पर्यटन विकास समितिले विदेशी नागरिकको शान्तिसुरक्षाका लागि अनुरोध मात्र गरेको बताईएको छ ।
