साउन ०६ धनगढी । सुदूरपश्चिम प्रदेशको धनगढी र महेन्द्रनगरमा ५७ करोड ६२ लाखको लागतमा निर्माण गरिएका होल्डिङ सेन्टर अलपत्र परेका छन । धनगढी उप–महानगरपालिका वडा नम्बर ३ मा निर्माण गरिएको एक हजार शैयाको होल्डिङ सेन्टर र कञ्चनपुरको भीमदत्त नगरपालिका वडा नम्बर १८ मा निर्माण गरिएको एक हजार शैयाको होल्डिङ सेन्टर अलपत्र परेका हुन ।
नेपाली सेना मार्फत हनुमान निर्माण सेवाले होल्डिङ सेन्टर निर्माण गर्न २०७८ को असारमा सम्झौता गरी काम सम्पन्न भएको एक वर्ष बढी समय भई सक्दा पनि होल्डिङ सेन्टर उपयोगमा आउन नसकेर अलपत्र परेका हुन । विद्युत र खानेपानीको समेत व्यवस्थापन गरिएका होडिङ सेन्टर सञ्चालनमा नआउदा अलपत्र परेका हुन । कोरोना संक्रमितहरुलाई राख्न निर्माण गरिएका होल्डिङ सेन्टर कोरोनाको संक्रमण कम भए संगै अलपत्र परेका हुन ।
स्वास्थ्य तथा जनसंख्या मन्त्रालयका सूचना अधिकारी डाक्टर पवनकुमार शाहले होल्डिङ सेन्टर सञ्चालनका विषयमा छलफल जारी रहेको बताएका छन । त्रिनगर–गौरीफन्टा सीमा नाका हुँदै स्वदेश फर्किनेहरुका लागि धनगढी उप महानगरपालीका वडा नम्बर ३ बडहरा र गड्डाचौकी सीमा नाका भएर फर्किने नेपालीका लागि भीमदत्त नगरपालिका वडा नम्बर–१८ सालघारीमा होल्डिङ सेन्टर निर्माण गरिएका छन ।
सुदूरपश्चिम प्रदेश सामाजिक विकास मन्त्रालयका सचिव ज्ञान प्रसाद ढकालले होल्डिङ सेन्टर सञ्चालनका लागि कुनै निर्णय नभएको बताए । उनले मुख्यमन्त्री तथा मन्त्रिपरिषद्को कार्यालय र जिल्ला प्रशासन कार्यालयलाई सुझाव माग गरिएको बताएका छन । होल्डिङ सेन्टरलाई अस्पतालको रुपमा सञ्चालन गर्ने विषयमा पनि छलफल भएको उनले बतए ।
सुदूरपश्चिम प्रदेश मुख्यमन्त्री तथा मन्त्रिपरिषद्को कार्यालय र जिल्ला प्रशासन कार्यालयहरुलाई संघीय सरकारले सुझाव माग गरेको उनले जानकारी गराउदै सञ्चालनको मापदण्ड नभएकाले दुई वर्षदेखि होल्डिङ सेन्टर अलपत्र रहेको बताए ।
