चैत्र १३ काठमाण्डौ, एजेन्सी । भारतमा एकैदिन १ हजार ८ सय ५ जनामा कोरोना भाइरस संक्रमण पुष्टि भएको छ । पछिल्लो २४ घन्टामा संक्रमण दर ३.१९ प्रतिशत रहेको स्वास्थ्य मन्त्रालयले जनाएको छ ।
सोही अवधिमा कोरोना संक्रमणबाट ६ जनाको मृत्यु भएको छ । दिल्लीमा दुई, उत्तर प्रदेश,गुजरात,हिमाचल प्रदेश र चण्डीगढमा एक÷एक जनाको मृत्यु भएको हो । स्वास्थ्य मन्त्रालयले सार्वजनिक गरेको आँकडामा हालसम्म देशमा ४ करोड ४७ लाख बढि मानिसमा संक्रमण देखिएको छ । हाल सक्रिय संक्रमितको संख्या १० हजार ३ सय पुगेको छ ।
पछिल्लो २४ घन्टामा महाराष्ट्रमा मात्रै ३ सय ९७ जना संक्रमित भेटिएका छन् । गुजरातमा ३ सय ३ जना संक्रमित भेटिएका छन् । यसका साथै केरलामा २ सय ९९ जना नयाँ संक्रमित थपिएको स्वास्थ्य मन्त्रालयले जनाएको छ । कर्नाटकमा २ सय ९ जना र दिल्लीमा १ सय ५३ नयाँ संक्रमित देखिएका छन् ।
पछिल्ला दिनमा कोरोना संक्रमण तीव्ररुपमा बढ्दै गए पनि आत्तिनु पर्ने अवस्था नरहेको विज्ञहरूले बताएका छन् । एम्सका पूर्वनिर्देशक डा.रणदीप गुलेरियाले एक्सबीबी १.१६ का कारण केसहरु बढ्दै गएको बताएका छन् ।
