मंसिर २६ बाँके (नरैनापुर) । नरैनापुर गाउँपालिकामा इलाका प्रशासन, मालपोत र नापी कार्यालय स्थापनाको लागि गाँउपालिकाले माग गर्ने निर्णय गरेको छ । नरैनापुर गाँउपालिकाको कार्यपालिकाको सोमबार बसेको बैठकले इलाका प्रशासन, मालपोत र नापी कार्यालय स्थापनाको लागि आवश्यक व्यवस्था गर्न जिल्ला प्रशासन कार्यालय बाँकेलाई लिखित निवेदन पेश गर्ने निर्णय गरेको प्रमुख प्रशासकिय अधिकृत मणिराम खरालले जानकारी दिनु भयो ।
सेवा प्रवाहमा सहज पहुँच नभएकाले संघीयताको मर्म र भावना अनुसार एकीकृत तथा विकेन्द्रीकृत सेवा प्रवाह गर्ने राज्यको नीति अनुसार गाँउपालिका क्षेत्रभित्र रहने गरी इलाका प्रशासन, मालपोत र नापी कार्यालय स्थापनाका लागि कार्यपालिकाबाटै निर्णय गरिएको गाँउपालिका अध्यक्ष इश्तियाक अहमद शाहले बताउनु भयो । नरैनापुर गाँउपालिकाबाट जिल्ला प्रशासन कार्यालय पुगेर सेवा लिन असहज भएकाले नागरिकलाई गाउँ–गाउँबाट सेवा दिने संघीयताको मर्म र भावना अनुसार गाँउपालिकामा इलाका प्रशासन, मालपोत र नापी कार्यालय आवश्यक भएको अध्यक्ष शाहले बताए ।
इलाका प्रशासन, मालपोत र नापी कार्यालयका लागि चाहिने भवनको व्यवस्था गाँउपालिकाले गर्ने समेत उनले जनाकारी गराएका छन । कार्यालय प्रमुखको व्यवस्था गरिदिन बारम्बार विभिन्न निकायमा आग्रह गर्दा पनि बेवास्ता भइरहेको गुनासो गर्दै अध्यक्ष शाहले नागरिकता, राहदानी र अन्य सिफारिस बनाउन सदरमुकाम जानुपर्ने बाध्यताको अझै अन्त्य नभएको बताृदै गाँउगाँउमा सिंहदरबार नाममा मात्र सिमित भएको बताए । उनले विकास निर्माण लगायत पञ्जीकरण र विभिन्न सरकारी कामकाज स्थानीय तहबाटै हुने गरे पनि जनताले नागरिकता बनाउन सास्ती भोगिरहेको जानकारी गराए ।
प्रशासनिक सेवाको सहजताका लागि इलाका प्रशासन, मालपोत र नापी कार्यालय जरुरी रहेको नरैनापुर गाउँपालीका वडा नम्बर–५ का अध्यक्ष कृष्ण चन्द्र मार्यले बताए । वडा नंम्बर. १ का अध्यक्ष इसाक जोलहाले कार्यालय स्थापना भए सदरमुकाम देखि ५५ किमीको दूरीमा रहेको सुईया र आसपासका सर्वसाधारण लाभान्वित हुने बताए ।
गाँउपालिका अध्यक्ष इश्तियाक अहमद शाहको अध्यक्षतामा बसेको कार्यपालिका बैठकमा उपाध्यक्ष जयन्तीदेबी श्रीवास्तव, वडा अध्यक्षहरु क्रमशः इसाक जोलहा,मसूद अहमद शाह,मनोज शर्मा,कृष्ण चन्द्र मौर्य, प्रेम चन्द्र मौर्य, प्रमुख प्रशासकिय अधिकृत मणिराम खराल, कार्यपालिका सदस्यहरु लगायतको सहभागिता रहेको थियो ।
