के नेपालले मिस इन्टरनेसनल २०२२ को उपाधि जित्ला ? जित्ने कुरालाई लिएर आशावादी हुन सकिन्छ । तर एउटा कुरा चाहिं के पक्का हो भने नेपाल यो ब्युटी पेजेन्टको दाबेदार पक्कै हो । मिस नेपाल इन्टरनेसनल न्यान्सी खड्काले मुलुकको प्रतिनिधित्व गरिरहेकी छन् । डिसेम्बर १३ मा हुने ग्राण्ड फिनालेमा ६८ जना सुन्दरीले उपाधिका लागि प्रतिस्पर्धा गर्नेछन् ।
नेपाल पनि यस संस्करणको दाबेदार हो भन्ने पुष्टि गर्न तीनवटा आधार पर्याप्त छन् । पहिलो– इन्टरनेसनल फोरममा नेपाल छानिन सक्यो । दोस्रो– जापानका मेयरहरुको भेटघाटमा नेपाल प्राथमिकतामा प¥यो र तेस्रो– राष्ट्रसंघीय दिगो विकासको थिममा तयार पारिएको भिडियो प्रस्तुतिमा नेपालले हासिल गरेको प्रतिक्रिया गज्जब छ । उक्त भिडियोमा न्यान्सीले मानसिक स्वास्थ्य, बालबालिकाको शिक्षा, स्वास्थ्य र भविष्यजस्ता मुद्दालाई प्रस्तुत गरेकी छन् ।
यसपटकको मिस इन्टरनेसनलको नारा पनि दिगो विकासका लागि सुन्दरता भन्ने छ । न्यान्सीले पनि मिस नेपालको फिनालेदेखि नेपाली मिडियासामु आफ्नो क्षमता प्रस्तुत गरिसकेकी छन् । उनको वाचाल कला र गज्जबको उत्तर दिनसक्ने क्षमता लोभलाग्दो छ । कोरोना महामारीपछि पहिलोपटक भौतिक रुपमा हुन लागेको प्रतियोगितामा यतिबेला सुन्दरीहरुले सबटाइटलमा प्रतिस्पर्धा गरिरहेका छन् ।
यसपटक मिस अर्थमा पनि नेपालले सिंगो एसिया र ओसियाना क्षेत्रबाट सर्वोत्कृष्ट इको–भिडियो अवार्ड पनि प्राप्त गरेको छ । मिस नेपाल अर्थ सरिशा श्रेष्ठले उक्त अवार्ड सहित यसै साता फिलिपिन्सबाट काठमाडौं फकिइसकेकी छन् ।
