फागुन ०६ बझाङ । बझाङमा पाठेघरको मुखको क्यान्सर विरुद्धको एचपीभी खोप अभियानको पहिलो दिन जिल्ला भरी १ हजार ४ सय ९७ जना किशोरीहरूले खोप लगाएका छन् । फागुन ४ गतेदेखि सुरु गरिएको पाठेघरको मुखको क्यान्सर विरुद्धको एचपीभी खोप अभियानको पहिलो दिन कक्षा ६ का १ हजार ४ सय ८० जना छात्रा र विद्यालय नजाने उमेर समूहका १७ जना किशोरी गरी १ हजार ४ सय ९७ जना किशोरीहरूले लगाएका हुन ।
जिल्ला स्वास्थ्य कार्यालयले साइपाल गाउँपालिकाका २८, बुगल नगरपालिकाका २ सय ८४, सुर्मा गाउँपालिकाका १सय, तल्कोट गाउँपालिकाका १ सय १६, मष्टा गाउँपालिकाका १ सय ८, जयपृथ्वी नगरपालिकाका १ सय ८७, छबिसपाथीभेरा गाउँपालिकाका ६८, दुर्गाथली गाउँपालिकाका ८७, केदारस्यु गाउँपालिका १ सय ३५, बित्थडचिर गाउँपालिकाका १ सय ७२, थलारा गाउँपालिकाका १ सय ३५, र खप्तडछान्ना गाउँपालिकाका ७७ जनाले खाप लगाएको जानकारी गराएको हो ।
त्यसैगरी स्वास्थ्य कार्यालय बझाङले खोप अभियानको अनुगमन पनि गरेको छ । जिल्ला खोप समन्वय समिति प्रमुख नर बहादुर बोहराको नेतृत्वमा केदारस्यु र छबिसपाथीभेरा लगायतका खोप केन्द्रमा अनुगमन गरिएको हो । अनुगमनमा स्वास्थ्य कार्यालयका भानुभक्त जोशी र जनस्वास्थ्य अधिकृत पारस खड्काको उपस्थिर्त रहेको थियो ।
अनुगमन टोलीले विद्यालय पुगेर किशोरीहरूले खोप पाए नपाएको जानकारी सङ्कलन गर्नूकासाथै खोपको महत्वबारे बुझाउँदै, छिमेकमा छुटेका किशोरीहरूलाई खोप अभियानमा ल्याउन आग्रह गरेको छ । खोप अभियानका लागि १२ वटै स्थानीय तहका विद्यालयहरूमा खोप केन्द्र तोकिएको छ । स्वास्थ्य कार्यालय बझाङका प्रमुख लाल बहादुर धामीले लक्षित उमेर समूहका सबै किशोरीहरूले खोप पाउन अभिभावक, विद्यालय र सरोकारवालालाई पूर्ण सहयोग गर्न आग्रह गरेका छन् ।
