माघ ०२ धनगढी । सुदूरपश्चिम प्रदेशमा निर्वाचन प्रहरीका लागि १६ हजार १ सय ९३ जनाले आबेदन दिएका छन । प्रदेशभरी १३ हजार ६ सय ६९ जना निर्वाचन प्रहरी माग गरिएकोमा बिहीबार सम्म १६ हजार १ सय ९३ जनाले आवेदन दिएका हुन ।
प्रदेशका केही पहाडी जिल्लामा भने माग अनुसार आवेदन परेको छैन । जिल्ला प्रहरी कार्यालय मार्फत सार्वजनिक विवरण अनुसार अछाम, डोटी, बझाङ, डडेल्धुरा र बैतडीमा माग गरिएको संख्या भन्दा कम आवेदन परेको हो ।
अछाममा १ सय ७६, डोटीमा ९०, बझाङमा ३८, डडेल्धुरामा १ सय ३७ र बैतडीमा २ सय ५९ जना कम आवेदन दर्ता भएको छ । अछाममा १ हजार ४ सय ६३, डोटीमा १ हजार ४०, बझाङमा १ हजार ४ सय ८४, डडेल्धुरामा ९ सय ४४ र बैतडीमा १ हजार २ सय ७९ जना निर्वाचन प्रहरी माग गरिएको थियो ।
त्यसैगरी तराईका जिल्ला कैलाली र कञ्चनपुरमा माग भन्दा धेरै आवेदन परेको छ । कैलालीमा ३ हजार ५ सय ७६ जना माग गरिएकोमा ५ हजार १ सय ५१ जनाले आवेदन दिएका छन् भने कञ्चनपुरमा २ हजार ३५ जना माग गरिएकोमा २ हजार ९ सय ६ जनाको आवेदन परेको छ ।
पहाडी जिल्ला बाजुरा र दार्चुलामा पनि माग गरिएको संख्या भन्दा बढी आवेदन परेको प्रदेश प्रहरी कार्यालयले जनाएको छ ।
