पौष २९ धनगढी । सुदूरपश्चिम प्रदेश सरकारले थारु समुदायको माघी पर्वको अवसरमा भोली पौष ३० गते सार्वजनिक बिदा दिने निर्णय गरेको छ ।
पश्चिम नेपालका थारु समुदायमा माघी पर्व पौष महिनाको अन्तिम दिन देखि सुरु हुने भएकाले प्रदेश सरकारले भोली सार्बजनीक बिदा दिएको हो ।
पौष महिनाको अन्तिम दिन थारु समुदायमा ‘जिता पर्व’का रूपमा बंगुर (जिता) मारेर सामूहिक रूपमा उत्सव मनाउने परम्परा रहेको छ । यही कारण प्रदेश राजपत्रमा पुस ३० गतेलाई ‘जिता पर्व’ उल्लेख गर्दै सार्वजनिक बिदा तोकिएको छ ।
थारु समुदायमा माघी पर्वलाई नयाँ वर्षका रूपमा मनाउने चलन छ । पौषको अन्तिम दिन देखि माघ १ र २ गतेसम्म विशेष कार्यक्रम सहित पर्व मनाइन्छ ।
माघ १ गतेलाई राष्ट्रिय पर्वका रूपमा सार्वजनिक बिदा दिइँदै आएको छ भने त्यसपछिका दिनहरूमा स्थानीय तहबाट पनि बिदा दिने प्रचलन रहँदै आएको छ ।
