पौष ०९ धनगढी । नेपाली कम्युनिष्ट पार्टीका नेता डा.भीम रावलले आगामी निर्वाचनमा नेपाली कम्युनिष्ट पार्टी ठुलो पार्टी बन्ने बताएका छन् । सुदूरपश्चिम प्रदेश समितिले बुधबार धनगढीमा आयोजना गरेको पत्रकार सम्मेलनमा बोल्दै उनले यस्तो बताएका हुन् ।
सुदूरपश्चिम प्रदेशका ९ वटै जिल्लामा पार्टीले एकता सन्देश सभा सम्पन्न गरेको जानकारी गराउदै उनले जनताको सद्भाव,समर्थन र सहभागिता हेर्दा पार्टी ठूलो पार्टी बन्ने बताएका हुन । नेपाली कम्युनिष्ट पार्टीलाई आर्थिक, कृषि, पर्यटन, स्वास्थ्य, सञ्चार सबै क्षेत्रमा विगतका कमजोरी सच्याएर देश र जनताको आवश्यकता अनुसार नयाँ गन्तव्यमा पु¥याउने उदेश्यका साथ लागिरहेको बताए ।
उनले आगामी फागुन २१ गतेको निर्वाचनमा सहभागी हुन आफ्नो पार्टी तयार रहेको बताउँदै सरकारले निर्वाचनका लागि स्वतन्त्र,निश्पक्ष र भयरहित वातावरण बनाउनु पर्ने बताए ।
आगामी निर्वाचनमा सहभागी भएर ताजा जनमत लिन पार्टी तयार भएको उनले बताए । देशलाई उचित निकास दिन अलमल गर्ने बेला नभएको बताउदै उनले सरकार भदौ २३ र २४ गते घटेका घटनाको निश्पक्ष छानविन गर्न र निर्वाचनको वातावरण बनाउनमा केन्द्रित हुनपर्ने बताए ।
नेपाली कांग्रेस र एमालेले द्वैध चरित्र देखाइ रहेको बताउदै उनले ‘कांग्रेसले आमनिर्वाचनमा जानुपर्छ पनि भन्ने र सांसदको हस्ताक्षर गरेर सर्वोच्चमा पनि जाने गरेको बताए । एमालेका अध्यक्ष केपी शर्मा ओलीले उम्मेदवार छान्न पार्टीपंतिलाई निर्देशन दिने र दिनहुँ संसद पुनस्थापना हुनुपर्छ भनेर भाषण गर्ने गरेको बताए । दुईटै पार्टीले द्वैध चरित्र देखाइरहेको उनले बताए ।
