पौष ०९ बैतडी । बैतडीको सुर्नया गाउँपालिका वडा नम्बर–४ कौलाडीकी २६ वर्षीया जानकी महरालाई सहयोग गरिएको दुई लाख २५ हजार आर्थिक सहयोग हस्तान्तरण गरिएको छ । मंगलवार विभिन्न व्यक्तिहरूबाट सङ्कलित सहयोग रकम घरबार विहिन महरालाई हस्तान्तरण गरिएको हो ।
सहयोग सङ्कलनका अभियान्ता तथा पत्रकार सुरेश महराले जानकीका श्रीमान् नरेश महराको गत मङ्सिर १८ गते मिनिट्रक दुर्घटनामा परी निधन भएको बताउदै श्रीमानको निधनपश्चात् घरसमेत नभएकी जानकीले किरिया समेत छिमेकीको घरमा बसेर गरेको बताए ।
नरेशले घरजग्गा सबै बेच्नुका साथै रातदिन कुटपिट गर्ने गरेकाले पीडा सहन नसकी जानकी पाटनस्थित सुरक्षित आवासगृहमा बस्दै आएको अबश्थामा श्रीमानको मृत्यु भएपछि जानकी र बालबच्चाको बिचल्ली भएकाले आर्थिक सहयोग सङ्कलन अभियान सञ्चालन गरिएकोउनले बताए ।
अभियानबाट सङ्कलित रकम हस्तान्तरण गरिएको जानकारी गराउदै उनले जानकीको बैंक खाता समेत नहुँदा सहयोग सङ्कलन अभियान चलाएको बताए । सहयोग गर्ने सबै दाताहरूलाई धन्यवाद समेत ज्ञापन गरिएको छ । पीडित जानकी महराको काठमाडौँस्थित किरण नमस्ते नेपाल संस्था र ग्रेस एकडेमी स्कुलमा बालबालिकाको पठनपाठनको व्यवस्था गरिएको उनले बताए ।
जानकी बालबच्चा सहित काठमाडौँ जाने तयारीमा भएको बताउदै उनले उनका दुई छोरी एक छोरा भएको बताए । जानकीले आफ्नै खाता समेत खोली सकेको बताउदै उनले सहयोग गर्न चाहनेले जानकी महराको बैतडीस्थित ग्लोबल आईएमई बैंकको खाता नम्बर ३८७०७०१००१४८१८ सहयोग जम्मा गर्नसक्ने बताए ।
