पौष ०६ कञ्चनपुर । सडक पूर्बाधारको विकासले कञ्चनपुरको लालझाडी गाउँपालिकाको मुहार फेरिएको छ । पछिल्ला वर्षहरूमा सडक पूर्वाधारको तीव्र विकास भए पछि लालझाडी गाउँपालिकाको मुहार फेरिएको हो । वर्षायाममा हिलो र हिउँदमा धुलोले हैरान पार्ने कच्ची सडकहरू क्रमशः कालोपत्रमा परिणत भएपछि स्थानीयको दैनिकीमा समेत परिवर्तन आएको छ । वर्षा सुरु हुनासाथ बाटो विग्रेर बिरामी परे अस्पताल पु¥याउन समेत कठिन हुने अवस्था रहेकोमा अहिले बाटो बनेपछि सहज भएको छ ।
कञ्जका स्थानीय बलराम रानाले सडकमा हिलो जम्ने भएकाले एम्बुलेन्स आउनु त परको कुरो मान्छेले बोकेर लैजान समेत समस्या हुने गरेको सुनाए । हिउँदमा सवारी चल्दा उड्ने धुलोले घर, खेतीपाती र स्वास्थ्यमा प्रतिकूल असर पार्ने गरेको सुनाउदै उनले स्थानीय सरकार गठनपछि विकासले गति लिएको बताए । रानाले नदीमा झोलुङ्गे पुल र पछि पक्की पुल निर्माण भएपछि आवत जावत गर्न सहज भएको अनुभव सुनाए ।
दोदा नदीको बल्मी क्षेत्रमा बनेको पक्की पुलले लालझाडीको पहुँचलाई नयाँ उचाइमा पु¥याएको उनले बताए । त्यसैगरी स्थानीय महेश्वरी रानाले आफ्नै घर अगाडि कालोपत्रे सडक देख्दाखुसी लागेको बताईन । सडक बन्ला भन्ने कल्पना समेत नगरेको बताउदै उनले सङ्घीयता र स्थानीय जनप्रतिनिधिको प्राथमिकताकै कारण सडक बन्दा सहज भएको बताईन । गाउँपालिकाको मुख्य केन्द्र देखि भित्री बस्तीहरू सम्म कालोपत्र सडकको सञ्जाल विस्तार हुँदै गएको उनले बताईन । गाउँपालिकाका प्रमुख प्रशासकीय अधिकृत राजबहादुर सार्कीले हालसम्म २७.५ किलोमिटर सडक कालोपत्र भइसकेको जानकारी गराए ।
गाउँपालिका, प्रदेश र सङ्घीय सरकारको सहकार्यमा चानदेव–बल्मी सडक, वडा नम्बरं २ को चक्रपथ र वडा नम्बरं १ का रणनीतिक सडक कालोपत्र गरिएको उनले जानकारी गराए । चालु आर्थिक वर्षमा थप ३२ किलोमिटर सडक कालोपत्र गर्ने योजना अघि बढाइएको उनले जानकारी गराए । प्रादेशिक तथा स्थानीय सडक सुधार कार्यक्रम, एडीबीको पीएलआर कार्यक्रम र चक्रपथ निर्माण मार्फत सडक विस्तार भइरहेको उनले बताए ।
त्यसैगरी कञ्चनपुरमै लालझाडी गाउँपालीका नगर अस्पताल निर्माण गरी अस्पताल सञ्चालनको तयारी गर्ने पहिलो पालीका भएको उनले जानकारी गराए । पूर्वाधार विकाससँगै दोदा नदीमा नन्द गाउँ–बल्मी र लालझाडी–भकुण्डा जोड्ने पक्की पुल सञ्चालनमा आएको जानकारी गराउदै उनले अन्य दुई वटा पुल निर्माणको कार्य अन्तिम चरणमा रहेको जानकारी गराए । संरचना निर्माणले वर्षायाममा जोखिमपूर्ण नदी तर्नुपर्ने बाध्यताको अन्त्य गरेको उनले बताए ।
सडक र पुल बनेपछि किसानले उखु र तरकारी जस्ता उत्पादन सिधै बजार र चिनी मिलसम्म पु¥याउन सहज भएको उनले बताए । एम्बुलेन्स र दमकल जस्ता आपत्कालीन सवारीसाधन गाउँका कुनाकुना सम्म पुग्न थालेको जानकारी गराउदै उनले सडकछेउ नयाँ बजार, पसल र साना उद्योग खुल्दै स्थानीय युवालाई गाउँमै रोजगारीको अवसर सिर्जना भएको बताए ।
