पौष ०६ बैतडी । बैतडीको पाटन नगरपालिकाले चालु आर्थिक वर्षमा पनि एचआइभी संक्रमित नागरिकलाई पोषण खर्च उपलब्ध गराउने भएको छ ।
आर्थिक वर्ष २०७९÷८० देखि निरन्तर रूपमा यस्तो सहयोग गर्दै आएको नगरपालिकाले यस वर्षका लागि एक लाख रुपैयाँ बजेट विनियोजन गरेर पोषण खर्च उपलब्ध गराउने भएको हो ।
नगरपालिकाका स्वास्थ्य शाखा प्रमुख मदनसिंह महराले हाल नगर क्षेत्रभित्र ३६ जना एचआइभी संक्रमित रहेको जानकारी गराए । विनियोजित एक लाख रुपैयाँबाट उनीहरूलाई पोषण खर्च उपलब्ध गराइने उनले जानकारी गराए ।
यसअघि आर्थिक वर्ष २०७९÷८० मा एचआइभी संक्रमितलाई तीन दिने व्यवसायिक तालिम समेत प्रदान गरी वस्तुगत सहयोगका लागि प्रति व्यक्ति १२ हजार रुपैयाँ उपलब्ध गराइएको उनले जानकारी गराए ।
आर्थिक वर्ष २०८०÷८१ मा प्रति व्यक्ति ६ हजार रुपैयाँ पोषण खर्च प्रदान गरिएको जानकारी गराउदै उनले गत आर्थिक वर्षमा ३५ जनालाई प्रतिव्यक्ति ५ हजार ७ रुपैयाँका दरले सहयोग गरिएको जानकारी गराए । नगर प्रमुख गौरीसिंह रावलले एचआइभी संक्रमितको जीवनयापनमा केही सहजता ल्याउने उद्देश्यले पोषण खर्चका लागि बजेट विनियोजन गरिएको बताए ।
जिल्लाका अन्य स्थानीय तहले भने एचआइभी संक्रमितका लागि छुट्टै बजेट व्यवस्था नगरेको जनाइएको छ । यसप्रति अन्य पालिकाले आफूहरूको समस्यामा ध्यान नदिएको भन्दै संक्रमितहरूले गुनासो गर्दै आएका छन् ।
