मंसिर २५ कञ्चनपुर । गत भदौ २४ गते भएको जेन्जी आन्दोलनका क्रममा जिल्ला अदालत कैलाली र कैलाली कारागारमा आगजनी गरेको आरोपमा प्रहरीले दश जनालाई पक्राउ गरेको छ । अदालतमा आगजनी गरेको आरोपमा ६ जना र कारागारमा आगजनी गरेको आरोपमा चार जना गरी १० जनालाई प्रहरीले पक्राउ गरेको हो ।
जिल्ला प्रहरी कार्यालय कैलालीका निमित्त प्रहरी प्रवक्ता प्रहरी निरीक्षक कैलाशसिंह विष्टले उनीहरूलाई धनगढी उपमहानगर पालिका क्षेत्रबाट विभिन्न मितिमा पक्राउ गरिएको जानकारी गराए ।
जिल्ला प्रहरी कार्यालय कैलालीका निमित्त प्रवक्ता विष्टले धनगढी उपमहानगरपालिका वडा नम्बर–३ बस्ने २४ वर्षीय आशिष भण्डारी, ३० वर्षीय अमन केसी र बैतडीको पुर्चौडी घर भई हाल धनगढी उपमहानगरपालीका वडा नम्बर–३ बस्दै आएका २४ वर्षीय भरत बम, धनगढी उपमहानगरपालीका वडा नम्बर वडा नम्बर–७ का एलेक्स चन्द, लक्ष्मण बहादुर विष्ट र धनगढी उपमहानगरपालीका वडा नम्बर–१ का मनोज विष्टलाई अदालतमा आगजनी गरेको अभियोगमा पक्राउ गरिएको जानकारी गराए ।
भदौ २४ गतेको आन्दोलनका क्रममा धनगढी उपमहानगरपालिका वडा नम्बर–१ स्थित जिल्ला अदालत परिसर भित्र रहेका सवारीसाधन, कार्यालय भवन, कार्यालय भवनभित्र रहेका विभिन्न मुद्दाका सक्कलै मिसिल, कम्प्युटर लगायत सूचना प्रविधिका उपकरणहरुमा आगजनी र तोडफोड गरिएको थियो । सोही आरोपमा प्रहरीले धनगढीबाट ६ जनालाई पक्राउ गरेको उनले जानकारी गराएका हुन ।
जिल्ला अदालतले घटनाको अनुसन्धान गरी दोषीलाई कारबाही गर्न माग गर्दै प्रहरीमा जाहेरी दिएको थियो । सोही जाहेरीका आधारमा ६ जनालाई पक्राउ गरिएको उनले जानकारी गराए ।
त्यसैगरी कैलाली कारागारमा आगजनी गरेको आरोपमा धनगढी उपमहानगरपालीका वडा नम्बर–२ का २८ वर्षीय गोपाल भट्ट, धनगढी उपमहानगरपालीका वडा नम्बर–३ का जेम्स भनिने सुरज कटुवाल, धनगढी उपमहानगरपालीका वडा नम्बर–९ का ४० वर्षीय बसन्तराज जोशी र १९ वर्षीय अंकित सक्सेनालाई पक्राउ गरिएको प्रहरी निरीक्षक विष्टले जानकारी गराए ।
