मंसिर २४ धनगढी । कैलालीको घोडाघोडी नगरपालिका वडा नम्बर–१ सुखडस्थित राष्ट्रिय माध्यमिक विद्यालयको जग्गा खाली गराउन पत्राचार गरिएको छ । २२ वर्षदेखि जग्गा भाडामा लिएर व्यापारी तथा स्थानीयले प्रयोग गर्दै आए पनि अधिकांशले भाडा नतिरेको र जमिन खाली नगरेकाले शिक्षा, विज्ञान तथा प्रविधि मन्त्रालयले गृह मन्त्रालयलाई जग्गा खाली गराउन पत्राचार गरेको हो ।
विद्यालयको नाममा रहेको सुखड बजारको पूर्वी क्षेत्रमा पर्ने कित्ता नम्बर २५१ को एक बिघा १२ कट्ठा जग्गा व्यापारीहरूले घर–टहरा बनाई बसोबास र व्यापार गर्दै आएपछि विद्यालयलाई आफ्नो प्रयोजनका संरचना बनाउन कठिनाइ हुँदै आएको छ ।
शिक्षा मन्त्रालयका उपसचिव कृष्णचन्द्र पोखरेलका अनुसार सोमबार पठाइएको पत्रमा अदालतले विभिन्न मितिमा आदेश दिए पनि जग्गा नछोडेर सरकारी स्वामित्वको जग्गा कब्जा गरिएको भन्दै आवश्यक समन्वयका लागि गृह मन्त्रालयलाई अनुरोध गरिएको छ । मन्त्रालयको सचिवस्तरको निर्णय पछि पत्राचार गरिएको हो ।
जग्गा उपयोग गर्दै आएको करिब १७० मध्ये केहीले मात्र भाडा तिरेका छन्, धेरैले वर्षौंदेखि नतिरेको विद्यालयको रेकर्डमा छ । विद्यालय व्यवस्थापन समितिका अध्यक्ष खगेन्द्र हमालका अनुसार करिब डेढ करोड रुपैयाँ भाडा उठ्न बाँकी रहेको छ ।
जसमा एक जना व्यक्तिबाट चार देखि ६ लाखसम्म उठ्न बाँकी देखिएको छ । विद्यालयले पटक–पटक ताकेता र सार्वजनिक सूचना दिए पनि भाडा उठाउन नसकेपछि अदालत धाउनुपरेको उनले बताए । विद्यालयको जग्गामा संरचना बनाइ कब्जा जमाए पछि २०७५ सालमा सुदूरपश्चिम प्रदेशकै एक मात्र नमुना विशेष विद्यालय सञ्चालन गर्ने सरकारी योजना पनि ढिलो भएको उनले बताए ।
