मंसिर २४ बाजुरा । बाजुराको हिमाली गाउँपालिका वडा नम्बर–३ मा पर्ने गुम्बा गाउँ अझै सडक, टेलिफोन र विद्युत् सुविधाबाट वञ्चित हुँदै आएको छ । जिल्ला सदरमुकाम मार्तडी देखि करिब २ सय किलोमिटर टाढा रहेको गुम्बा गाउँ अझै सडक, टेलिफोन र विद्युत् सुविधाबाट वञ्चित हुँदै आएको हो । वडाध्यक्ष मङ्गल बुढाले अहिले पनि सडक, टेलिफोन र विद्युत् सेवा पुग्न नसकेको गाउँमा ६५ घरधुरी रहेको बताए ।
गुम्बाका स्थानीय अहिले सम्म पनि घोडा–भेडाको भरमा दैनिक उपभोग्य सामग्री ढुवानी गर्न बाध्य भएको उनले बताए । २०७६ सालमा पालिकाले घोरेटो बाटो निर्माण गरेपछि गाउँ–पालिकाबीचको आवत जावत केही सहज भएको बताउदै उनले त्यसभन्दा अगाडि ठूलो भिर रहेकाले गाउँ पुग्न नसकेको जानकारी गराए । एकीकृत योजना नहुँदा वर्षौंदेखि बाटो निर्माण अन्योलमै रहेको उनले बताए ।
गत आर्थिक वर्ष संघीय सरकारले गुम्बासम्म सडक पु¥याउन करिब पाँच करोड रुपैयाँ विनियोजन गरेकोभए पनि रकम रोकिए पछि काम अघि बढ्न नसकेको उनले बताए । वडाध्यक्ष बुढाले स्थानीय फेरि पहिले जस्तै सडकविहीन अवस्थामै रहेको बताए । गुम्बा टेलिफोन र इन्टरनेट सेवाबाट पनि पूर्णतः वञ्चित भएको बताउदै उनले जिल्लाका अधिकांश ठाउँमा २०६४ साल देखि सेवा विस्तार हुँदै गए पनि गुम्बाभरी आजसम्म टेलिफोन सुविधा नपुगेको बताए ।
त्यसैगरी स्थानीय जसबहादुर भण्डारीले टेलिफोन, सडक, बत्तीबाट बञ्चीत भएको बताउदै उनले अझै झरो र टुकीमा निर्भर रहेको बताए । विच्छ्या खोलाबाट उत्पादन भएको विद्युत् २०७८ सालमा गाउँमा पुगे पनि गत साउनको बाढीले नहर बगाए पछि आजसम्म बत्ती नबलेको उनले बताए ।
गाउँपालिकाका अध्यक्ष गोविन्द बहादुर मल्लले गुम्बा अत्यन्तै दुर्गम भएकाले पालिकाले मात्रै सडक निर्माण गर्न सम्भव नभएको बताए । संघीय बजेट आवश्यक भएको बताउदै उनले गुम्बा धार्मिक तथा पर्यटकीय दृष्टिले महत्वपूर्ण भए पनि बस्ती अझै आधारभूत सेवा–सुविधाबाट बञ्चीत भएको बताए ।
