मंसिर २३ दार्चुला । दार्चुला र कञ्चनपुर जिल्लाबाट लागुऔषध सहित ५ जनालाई प्रहरीले पक्राउ गरेको छ । गोप्य सूचनाका आधारमा कञ्चनपुरबाट खटिएको प्रहरी टोलीले लागुऔषध सहित तीन जनालाई र दार्चुलाको खलंगा बजारमा शंकास्पद रूपमा हिँडिरहेका २ जना गरी ५ जनालाई प्रहरीले लागुऔषध सहित पक्राउ गरेको हो ।
बेलौरी नगरपालिका वडा नम्बर–६ महाकाली क्याम्पस नजिक बेलौरीतर्फ आउँदै गरेको सुपप्र ०१–०१ ह ५५०५ नम्बरको अटो चेकजाँच गर्दा अटो चालक धनगढी उप–महानगरपालिका वडा नम्बर–३ बोराडाँडीका २७ वर्षीय नरेन्द्र बोहरा, अटोमा सवार चौराहा बस्ने ३६ वर्षीय प्रेम खत्री र वडा नम्बर १३ राजपुर बस्ने ४० वर्षीय चक्रपति गिरीलाई प्रहरीले पक्राउ गरेको हो ।
उनीहरुको साथबाट २ ग्राम ५० मिलिग्राम खैरो हेरोइन जस्तो देखिने पदार्थ फेला परेको प्रहरीले जनाएको छ । प्रहरीले अटो, बरामद पदार्थ र तिनै जनालाई नियन्त्रणमा लिएर थप अनुसन्धान अघि बढाएको जनाएको छ ।
त्यसैगरी दार्चुलाको व्यास गाउँपालिका वडा नम्बर–६ हुती घर भई महाकाली नगरपालिका वडा नम्बर–४ बस्ने २२ वर्षीय बिजय टमटा र महाकाली नगरपालीका वडा नम्बर–४ खलंगा बस्ने २१ वर्षीय धिरज लुहारको साथबाट ३१ ग्राम चरेश जस्तो देखिने पदार्थ फेला परेको जिल्ला प्रहरी कार्यालय दार्चुलाले जानकारी गराएको छ । उनीहरू दुवै जनालाई लागुऔषध सहित नियन्त्रणमा लिएर आवश्यक अनुसन्धान अगाडी बढाइएको प्रहरीले जानकारी गराएको छ ।
