मंसिर २३ बैतडी । बैतडीको पाटनस्थित भीमदत्त बहुप्राविधिक शिक्षालयले स्थानीय नागरिकलाई सीपमूलक तालिम प्रदान गर्दै आएको छ । प्राविधिक शिक्षा तथा व्यवसायिक तालिम परिषद्को आंगिक शिक्षालयको रूपमा रहेको शिक्षालयले हरेक वर्ष छोटो अवधिको तालिम सञ्चालन गर्दै आएको शिक्षालय प्रमुख जीवनदत्त पन्तले बताए ।
यस वर्ष पनि च्याउ उत्पादक (तह १) र बिल्डिङ इलेक्ट्रीसियन (तह १) तालिम सञ्चालन गरिएको बताउदै उनले दुवै तालिम ६५ दिनसम्म चल्ने बताए । प्रत्येकमा २०÷२० जनाको सहभागिता रहेको पन्तले बताए ।
शिक्षालयले डिप्लोमा तहको सिभिल इन्जिनियरिङ, फार्मेसी र एग्रीकल्चर सम्बन्धी पढाइका साथै सोही विषयसँग सम्बन्धित छोटो अवधिका तालिम पनि सञ्चालन गर्दै आएको उनले बताए ।
निशुल्क रूपमा सञ्चालन भइरहेका यी तालिमबाट स्थानीय नागरिकले लाभ उठाउने पन्तले बताए । तालिमको गुणस्तर सुनिश्चित गर्न राष्ट्रिय सीप परीक्षण समितिले मूल्यांकन गर्ने र यसका प्रशिक्षित व्यक्तिहरू वैदेशिक रोजगारमा समेत सहज हुने पन्तले जानकारी गराए ।
