मंसिर १७ कञ्चनपुर । कञ्चनपुरको कृष्णपुर नगरपालिका वडा नम्बर– ७ स्थित गौरीघाट सामुदायिक वनबाट १ सय ३९ वटा रुख कटान गरी गायब गरिएको छ । डिभिजन वन कार्यालय कञ्चनपुरका अनुसार मंसिर११ गते दिउँसो एक घण्टाको अवधिमा गौरीघाट सामुदायिक वनबाट १ सय ३९ वटा रुख कटान गरी गायब गरिएको हो ।
डिभिजन वन कार्यालयका प्रमुख सुरेशचन्द्र डीसीका अनुसार सामुदायिक वनमा रहेका १ सय १६ वटा खयर, २२ वटा सिसौ र एक कन्जु गरी १ सय ३९ वटा रुख काटिएको छ । डिभिजन प्रमुख डीसीले ‘सामुदायिक वन रित्तो हुने गरी रुख कटान गरेर काठ गायब गरिएको बताउदै वन क्षेत्रमा मुढा मात्रै छोडिएको बताए ।
केही जिम्मेवार व्यक्तिकै निर्देशनमा ६० देखि ७० जनाको समूहले एक घण्टाको अवधिमा ती रुख काटेको प्रारम्भिक अनुसन्धानबाट खुलेको उनले बताए । कोरियाली संस्थाको सहयोगमा प्राविधिक शिक्षालय स्थापनाको तयारीमा कृष्णपुर नगरपालिका रहेको र‘शिक्षालय स्थापनाका लागि रुख कटान गर्नुपर्ने भएपछि जनप्रतिनिधिको निर्देशनमा रुखहरू काटेको बुझ्नमा आएको डीसीले बताए ।
रुख कटानको अनुमतिका लागि प्रक्रिया लामो भएकाले स्थानीय बासिन्दालाई अगाडि सारेर रुख काटिएको हुन सक्ने उनले बताए । एकैपटक ठूलो संख्यामा अवैध रूपमा रुख कटान भएपछि सवडिभिजन वन कार्यालय वाणीका प्रमुख भरत शाहको नेतृत्वमा छानबिन सुरु गरिएको डिभिजन वन प्रमुख डीसीले जानकारी गराए ।
सामुदायिक वनमा अवैध रूपमा रुख काटेको विषयमा कृष्णपुर नगरपालिकाका जनप्रतिनिधसँग सोधपुछ भइसकेको डीसीले बताए । सामुदायिक वनका पदाधिकारीलाई पनि सोधपुछका लागि बोलाइएको डीसीले बताए । प्राविधिक शिक्षालय स्थापनाका लागि कष्णपुरका जनप्रतिनिधिले रुख काट्न निर्देशन दिएको आरोप लागेको छ ।
