मंसिर १७ धनगढी । कैलालीका किसानहरूलाई हिउँदेबालीका लागि आवश्यक रसायनिक मल पाउन समस्या भएको छ । रसायनिक मलको अभावका कारण एक बोरा मलका लागि किसानहरू रातभर लाइनमा बस्न बाध्य भए पनि मल पाउन समस्या भएको हो । रातभर कुर्दा पनि धेरै किसानहरू मल नपाई रित्तोहात फर्किनु पर्ने अवस्था रहेको छ । कैलालीको भजनी नगरपालिकामा यो समस्या सबैभन्दा बढी देखिएको छ ।
अधिकांश कृषियोग्य जमिन रहेको भजनीमा किसानहरूले गहुँ, तरकारी तथा अन्य हिउँदेबालीमा मल हाल्ने समयमा मल अभाव भएपछि खेती प्रभावित हुने चिन्ता बढेको छ । बिक्रि केन्द्रहरूमा किसानहरू रातभर लाईनमा बसे पनि सीमित मात्रामा मल वितरण गरिँदा सबैले मल नपाएको अबश्था रहेको छ ।
भजनीका किसान हरि प्रसाद चौधरीले हरेक वर्ष जस्तै यस वर्ष पनि मलको समस्या दोहोरिएको बताखए । राती १२ बजे देखि लाइनमा बसेर पनि बिहान खाली हात फर्किनुपर्ने अवस्था रहेको उनले बताए । खेतीको सिजन आए पनि मल नभएकाले बाली लगाउने कि मलको पछाडि दौडिने भन्ने चिन्तले सताएको बताए ।
धान बिक्री गर्न हप्तौँसम्म लाइन बस्नुपर्ने बाध्यता झेलेका किसानहरु गहुँ छर्ने महत्वपूर्ण समयमा रातभर लाइनमा बसेर पनि मल नपाउँदा थप समस्यामा परेका छन । भजनीका अर्का किसान भरत चौलागाँइले मल सहज रुपमा नपाउँदा उत्पादन घट्ने र किसानको लागत बढ्ने अवस्था आएको बताए ।
उनले सरकारले मल वितरण प्रणालीलाई प्रभावकारी बनाएर सहज रूपमा उपलब्ध गराउनुपर्ने बताए । साल्ट ट्रेडिङ कर्पोरेसन र कृषि सामग्री कम्पनी लिमिटेड मार्फत मल वितरण हुँदै आएको भएपनि साल्ट ट्रेडिङले केही दिनभित्र मल वितरण सुरु गर्ने तयारी गरेको जनाएको छ ।
कृषि सामग्री कम्पनी लिमिटेडका अनुसार जिल्लामा प्राप्त हुने सरकारी कोटा सीमित भएकै कारण सबै किसानलाई एकैपटक मल उपलब्ध गराउन कठिन भइरहेको छ । कृषि सामग्री कम्पनी प्रादेशिक कार्यालय धनगढीका प्रमुख नवल सिंह बोगटीले माग भन्दा आपूर्ति न्यून भएकाले समस्या भएको बताएका छन् ।
सरकारी कोटा अनुसार मात्र मल वितरण गर्न पाउने व्यवस्था भएकाले जिल्लाका सबै किसानको माग धान्न नसकिएको उनले बताए । मल सीमित र माग अत्यधिक भएकाले सबैलाई उपलब्ध गराउन कठिन भएको बोगटीले बताए । मल नियमित रुपमा गइरहेको बताउँदै उनले अभाव नभएको बताएका छन ।
