मंसिर १७ धनगढी । कैलालीको लम्कीचुहा नगरपालिका वडा नम्बर–१० चुहामा निर्माणाधीन सामुदायिक अस्पतालको काम रोकिएपछि अस्पताल अलपत्र परेको छ । निर्माण कम्पनीका ठेकेदारले काम रोकेपछि अस्पताल निर्माणको कार्य अलपत्र परेको हो । काम गरेवाफतको भुक्तानी बाँकी रहेको भन्दै निर्माण कम्पनीले काम रोकेको बताईएको छ ।
दुई वर्षभित्र ५० शय्याको सामुदायिक अस्पताल तयार पार्नेगरी ठेक्का पाएको केएस–शनिदेव जेभी महेन्द्रनगरले झन्डै दुई वर्षदेखि अस्पतालको काम नगरेको बताईन्छ । डेढ वर्षसम्म निर्माणको काम गरेर कम्पनीले बाँकी काम रोकेर राख्दा पाँच वर्षसम्म अस्पताल बन्न सकेको छैन ।
५० लाख रुपैयाँ भुक्तानी लिन बाँकी रहेको भन्दै निर्माण कम्पनीका ठेकेदारले बाँकी काम नगरेको वडा अध्यक्ष हर्कबहादुर कठरिया थारुले बताए । बजेट अभावको कारण अस्पताल निर्माणको काम अगाडि बढ्न नसकेको बताउदै उनले भुक्तानी बाँकी रहेको भन्दै ठेकेदारले काम रोकेको लामो समय भएको बताए ।
अस्पताल निर्माणको कार्यले पूर्णता नपाउँदा बनेका संरचनामा क्षति भइरहेको उनले बताए । अस्पताल भवनको निर्माण कार्य अझै धेरै बाँकी रहेको बताउदै उनले चार–पाँच वटा क्वार्टर सहितका केही संरचना भने तयार भइसकेको बताए । अधुरो अस्पताल र बनेको संरचनाको संरक्षण हुन नसकेको बताउदै उनले क्वार्टर र अस्पताल भवन लागुऔषध दुव्र्यसनमा फसेका युवायुवतीको गलत कार्यस्थल बनेको बताए ।
त्यसैगरी झ्याल, ढोका, सीसा लगायतका संरचनामा क्षति पुगेको बताउदै उनले रेखदेख गर्ने कोही नहुँदा संरचनामा क्षति गर्ने, सामान चोरी गरेर लैजाने लगायतका कामहरु भइरहेको बताए । वडा अध्यक्ष कठरिया थारुले दुई वर्षमा अस्पताल तयार पार्नेगरी आर्थिक वर्ष २०७७–७८ मा अस्पताल निर्माणको ठेक्का भएको बताए ।
नगरपालिकाका इन्जिनियर भरतराज जोशीले भ्याट सहित १४ करोड ८५ लाख रुपैयाँमा ठेक्का सम्झौता भएको बताउदै अस्पताल निर्माणमा निर्माण कम्पनीले आफूले काम गरेवाफतको भुक्तानी लिइसकेको बताए । काम गरेको बिल, भर्पाइ पेश गरेपछि मात्रै अर्थ मन्त्रालयबाट बजेट आउने बताउदै उनले डेढ वर्षसम्म सामुदायिक अस्पताल निर्माणको काम गरेर त्यसपछि बाँकी काम ठेकेदारले छोडेको जानकारी गराए ।
इन्जिनियर जोशीले फेरि काम गर्न आउने भनेर सुनेको बताउदै कहिले देखि काम गर्ने भन्ने विषयमा जानकारी नभएको बताए । लम्कीचुहा नगरपालिकाले गाडी खरिदका लागि छुट्याएको ७५ लाख रुपैयाँबाट तत्कालीन नगर प्रमुख महादेव बजगाइँको पाला देखि अस्पताल निर्माणको कार्य सुरु गरिएको उनले बताए ।
७५ लाख रुपैयाँले अस्पताल भवनको भुइँतलाको निर्माण गरिएको बताउदै उनले त्यसपछि बाँकी काम सङ्घीय सरकारको बजेटमा भएको बताए । वडा अध्यक्ष कठरिया थारुले अस्पताल निर्माणका लागि तत्कालीन प्रदेश सभा सदस्यको स्थानीय पूर्वाधार विकास कार्यक्रमबाट एक करोड १३ लाख र सङ्घीय सांसदको स्थानीय पूर्वाधार विकास कार्यक्रमबाट एक करोड १० लाख बजेट प्राप्त भएको जानकारी गराए ।
त्यसैगरी पूर्व नगर प्रमुख महादेव बजगाइँले अस्पताल निर्माणमा धेरै बजेट खर्च भइसकेको बताउदै साढे पाँच बिघा जमिनमा निर्माणाधीन अस्पतालको निर्माण कार्य रोकिनु दुःखद भएको बताए । आफ्नो पालामा अस्पताल निर्माणको काम भए पनि नेतृत्व बदलिएसँगै काम थन्किएको उनले बताए ।
