मंसिर १७ धनगढी । कैलालीको धनगढी उपमहानगरपालिका वडा नम्बर–६ मटियारीका बिखलु रानाले तरकारी खेतीबाट मनग्य आम्दानी गर्दै आएका छन । बिगत २५ वर्षदेखि व्यवसायिक तरकारीखेती गर्दै आएका उमेरले ५२ वर्षीय रानाले तरकारी खेतीबाट मनग्य आम्दानी गर्दै आएका हुन ।
प्राय बारीमै व्यस्त हुने गरेका रानाको दिनचर्या तरकारी लगाउनु,गोडमेल गर्नु,तरकारी लगेर बजारमा बेच्नमा वित्ने गरेको छ । १० कठ्ठा जग्गामा व्यवसायिक तरकारीखेती गरेको बताउँदै उनले अहिले बारीमा बन्दा,काउली,ब्रो काउली, खुर्सानी,टमाटर,भाजी,मूला लगायतका तरकारी लगाएको बताए ।
दिनभरी तरकारी बारीमा व्यस्त हुने ग रेको बताउदै उनले बिहानपख बजारमा तरकारी बिक्री गर्न जाने गरेको बताए । बजारमा दैनिक २ हजार ५ सय सम्मको तरकारी बिक्री गर्ने गरेको बताउँदै उनले सिजनमा राम्रै बिक्री हुने गरेको बताए । कम बिक्री भएको दिन २ हजार सम्म र बढी बिक्री भएको दिन २ हजार ५ सय सम्म आम्दानी हुने गरेको उनले बताए ।
तरकारी बारीमा गरेको मेहनत खेर नजाने बताउदै रानाले तरकारी खेतीबाट भएको आम्दानीले आरामले घरखर्च चलेको बताए । जग्गा बाँझो नराख्ने आफ्नो मान्यता रहेको बताउँदै रानाले बारीमा जग्गा खाली रहेको ठाउँमा तरकारी लगाइहाल्ने गरेको बताए ।
मौसमी र बेमौसमी दुबै किसिमका तरकारी उत्पादन गर्ने गरेको बताउदै उनले तरकारीखेतीबाट आम्दानी राम्रै हुने गरेको बताए । वार्षिक ५ लाखसम्म आम्दानी हुने गरेको बताउदै उनले ८ जनाको परिवार यसैबाट भएको आम्दानीले चलेको बताए ।
यसैबाट भएको आम्दानीले तरकारी बारीमा सिंचाइका लागि बोरिङ हालेको बताउदै उनले तरकारी खेतीमा मेहनतका साथ काम गरे रोजगारीका लागि भौतारिन नपर्ने बताखए । आफ्नै बारीमा काम गरेको बताउदै उनले स्वरोजगार बनेर घरमै बसेर काम गर्न पाइएको बताए ।
