कार्तिक २२ कञ्चनपुर । कञ्चनपुरमा नौ वर्षमा जङ्गली हात्तीको आक्रमणबाट १७ जनाको मृत्यु भएको छ । हात्तीको आर्कमणबाट ९ बर्षमा तीन जना महिला र १४ जना पुरुष गरी १७ जनाको मृत्यु भएको हो ।
शुक्लाफाँटा राष्ट्रिय निकुञ्ज र डिभिजन वन कार्यालयको तथ्याङ्क अनुसार २०७३ सालयता निकुञ्ज, राष्ट्रिय तथा सामुदायिक वन वरपर १७ जना सर्वसाधारणले ज्यान गुमाएका हुन् । डिभिजन वन कार्यालय कञ्चनपुरका अधिकृत सोफिया भट्टराईले राष्ट्रिय वन तथा सामुदायिक वन र आसपासका क्षेत्रमा मात्रै नौ वर्षमा आठ जनाले ज्यान गुमाएको बताईन ।
हात्तीको आक्रमणबाट दुई जना घाइते भएको तथ्याङ्कमा उल्लेख गरिएको छ । मृत्यु भएका प्रतिव्यक्तिलाई १० लाखका दरले मृतकका परिवारलाई क्षतिपूर्ति दिइएको अधिकृत भट्टराईले बताईन । घाइतेहरुको प्रकृति हेरेर उपचार खर्च दिने व्यवस्था रहेको उनले बताईन ।
पछिल्लो समय कञ्चनपुरको भीमदत्त, बेलौरी, बेदकोट, शुक्लाफाँटा नगरपालिका र लालझाडी र बेल्डाँडी गाउँपालिकामा जङ्गली हात्तीले नोक्सान पु¥याउँदै आएको छ । जङ्गली हात्ती बस्ती पस्दा स्थानीय रातभर जाग्राम बस्ने गरेका छन् भने पालिका र सरोकारवाला निकाय हात्ती धवाउन खटिने गरेका छन् ।
शुक्लाफाँटा राष्ट्रिय निकुञ्जका सूचना अधिकृत पुरुषोत्तम वाग्लेले हात्तीको आक्रमणबाट २०७५ सालयता नौ जनाको मृत्यु भइसकेको जानकारी गराए । यो अवधिमा नौ जनाको मृत्यु, सात जना गम्भीर र चार जना सामान्य घाइते भएको उनले बताए ।
तुलनात्मक रुपमा यस वर्ष विगतको भन्दा निकुञ्ज र मध्यवर्ती क्षेत्रमा जङ्गली हात्तीको आवात जावत बढी देखिएको बताउदै उनले हात्ती धपाउन निकुञ्ज र निकुञ्ज सुरक्षार्थ खटिएको नेपाली सेनाको श्रीरणसिंह दलगण टोली तयारी अवस्थामा रहने गरेको जानकारी गराए ।
