कार्तिक २२ अछाम । अछामको बासुकी माध्यमिक विद्यालयले तिहारमा देउसीभैलो खेलेर ११ लाख १५ हजार ९ सय ६२ रुपैया संकलन गरेको छ । अछामको मेल्लेख गाउँपालिका वडा नम्बर–४ कुस्कोटमा रहेको बासुकी माध्यमिक विद्यालयले तिहारमा देउसीभैलो खेलेर ११ लाख १५ हजार ९ सय ६२ रुपैया संकलन गरेको हो ।
विद्यालय व्यवस्थापन समितिका अध्यक्ष गोकुल शाहले विद्यालय व्यवस्थापन समिति, शिक्षक, अभिभावक र स्थानीय युवाले ‘बासुकी माध्यमिक विद्यालय निर्माणमा हाम्रो सहभागिता, कक्षा ११, १२ सञ्चालनमा अक्षय कोष स्थापनामा हाम्रो ऐक्यवद्धता’ भन्ने मूल नाराका साथ देउसी–भैलो अभियानको थालनी गरेको बताए ।
अछामका विभिन्न गाउँमा पुगेर मौलिक गीत देउडा खेल्दै भैली टिमले आर्थिक संकलन गरेको उनले जानकारी गराए । अभियान गाउँमा मात्र नभई सामाजिक सञ्जाल फेसबुक र ह्वाट्सएप मार्फत देश–विदेशमा छरिएर रहेका ५ सय ९० जना कुस्कोटवासी सम्म पुगेको उनले जानकारी गराए ।
देश–विदेशमा रहेका उनीहरूले गाउँको स्कुलका लागि दिल खोलेर सहयोग गरेको उनले जानकारी गराए । शाहले अभियानको पहिलो चरणमा सङ्कलन भएको रकमलाई तत्काल खर्च नगरी एउटा ‘अक्षय कोष’मा राखिने बताए ।
कोषको मूलधनलाई सधैँ सुरक्षित राखेर त्यसबाट आउने वार्षिक ब्याजबाट कक्षा ११ र १२ का लागि आवश्यक शिक्षकको तलब, शैक्षिक सामग्री, प्रयोगशाला व्यवस्थापन र गरिब तथा जेहेनदार विद्यार्थीलाई छात्रवृत्ति प्रदान गरिने उनले जानकारी गराए ।
अभियानले राम्रो सुरुवात गरेको बताउदै उनले हरेक रुपैयाँमा स्थानीय दाजुभाइ र दिदीबहिनीको पसिना र माया मिसिएको बताए ।
उच्च माध्यमिक तहको शिक्षाका लागि आर्थिक स्रोतको अभाव परीपूर्ती गर्न देउसीभैलो खेलेर रकम संकलन गरिएको उनले बताए । स्थानीय मानवहादुर साउँदले विद्यालयमा ०८१ साल देखि कक्षा ११ र यस वर्षदेखि १२ कक्षाको पठनपाठन सुरु गरिएको बताए ।
एसईई सकेका विद्यार्थीलाई उच्च माध्यमिक तह पढ्न धनगढी, महेन्द्रनगर लगायतका स्थानमा जानुपर्ने बाध्यता हटाउन तथा छोरीहरूलाई उच्च माध्यमिक तहसम्मको अध्ययनलाई सहज गराउन गाउँकै विद्यालयमा ११ र १२ कक्षाको पढाइ सुरु गरिएको साउँदले बताए ।
आर्थिक स्रोत सबैभन्दा ठुलो चुनौती बनेको बताउदै उनले विद्यालयमा प्राथमीक विद्यालयतर्फ ४ जना स्थायी दरबन्दीका शिक्षक भएको बताए । त्यसैगरी २ जना माध्यामीक विद्यालय र एक जना निम्न माध्यामीक विद्यालय गरी ३ जना राहत शिक्षक रहेको उनले बताए ।
संघीय अनुदानमा एक जना र गाउँपालिकाको अनुदानमा ६ जना शिक्षक कार्यरत भएको जानकारी गराउदै उनले गाउँपालिकाको अनुदानमा राखिएका ६ जना शिक्षक मध्ये प्राथमीक विद्यालयमा १, निम्न माध्यामीक विद्यालयमा २, माध्यामीक विद्यालयमा १ र कक्षा ११ र १२ मा दुई जना रहेको जानकारी गराए । त्यसैगरी स्थानीय स्रोतमा प्राथमीक विद्यालयमा १, निम्न माध्यामीक विद्यालयमा १ जना शिक्षक राखिएको बताए ।
१७ जना शिक्षक, एक जना लेखापाल र एक जना परिचर गरी विद्यालयमा १९ जना कर्मचारी रहेको जानकारी गराउदै उनले अझै कक्षा ११ र १२ का लागी दुई जना शिक्षकको आवश्यकता रहेको जानकारी गराए ।
गाउँपालिकाको अनुदानमा ६ जना र स्थानीय स्रोतबाट २ जना शिक्षक थपेर जेनतेन चलेको विद्यालयलाई ‘प्लस टु’ सञ्चालन गर्न थप दुई जना शिक्षकको तलब व्यवस्थापन गर्न तिहारमा देउसीभैलो मार्फत रकम जुटाएर अक्षयकोष खडा गरिएको उनले जानकारी गराए ।
