कार्तिक १७ दार्चुला । महाकाली कोरिडोर (ब्रह्मदेव–झुलाघाट–दार्चुला–टिङ्कर सडक) योजना अन्तर्गत पर्ने दार्चुला जिल्लामा रहेको ३० किलोमिटर सडक कालोपत्रे गर्ने काम सुरु गरिएकोे छ ।
कालोपत्रे गरिने सडक खण्डलाई तीन प्याकेजमा विभाजन गरेर कालोपत्रे गर्नुपूर्व गरिने काम सुरु गरिएको हो ।
योजनाका सूचना अधिकारी एवं इन्जिनियर रामचन्द्र जैसीले दार्चुला जिल्लामा पर्ने सलेती देखि बेतखण्डको १२.३ किलोमिटर र खलङ्गा देखि सुन्सेरा खण्डको १८.५ किलोमिटर सडक खण्डमा ब्याक कटिङ, भुइँ तह, सहायक तह र मुख्य आधार तह निर्माण गर्ने कार्य सुरु गरिएको बताए ।
४९ करोड १० लाख १३ हजार ७ सय १३ रुपैयाँमा २०७९ साल असार २० गते निर्माण कम्पनीसँग सम्झौता गरिएको उक्त सडकको यस वर्षदेखि कालोपत्रेको काम सुरु भएको उनले जानकारी गराए ।
सलेतीदेखि बेतसम्मको सडक कालोपत्रे गर्ने काम राजेन्द्र निर्माण सेवाले गरिरहेको छ भने खलङ्गा देखि चल्लेगडा खण्ड र चल्लेगडा देखि सुन्सेरा सम्मको सडकखण्ड कालोपत्रे गर्ने काम सिएबी ग्वाल्लेक जेभीले गरिरहेको उनले जानकारी गराए ।
चल्लेगडा–सुन्सेरा सडक खण्ड कालोपत्रे गर्नका लागि ४२ करोड ६८ लाख ४० हजार ७ सय ३३ रुपैयाँको ठेक्का टेन्डर भएको उनले जानकारी गराए । सलेती–बेत सडक खण्डमा ५३ प्रतिशत, खलङ्गा–चल्लेगडा सडक खण्डमा ५६ प्रतिशत र चल्लेगडा–सुन्सेरा सडक खण्डमा २५ प्रतिशत भौतिक प्रगति भएको उनले जानकारी गराए ।
चालु आर्थिक वर्ष २०८२÷८३ मा १० किलोमिटर सडक कालोपत्रे गर्ने लक्ष्य रहेको भए पनि बजेट न्युन रहेको उनले बताए । कार्यालयलाई यस वर्ष २२ करोड ९७ लाख रुपैयाँ विकास बजेट प्राप्त भएको बताइएको छ । कार्यालयलाई एक अर्ब ४९ करोड ठेक्का दायित्व रहेको उनले जानकारी गराए ।
कोरिडोरले कञ्चनपुरको ब्रह्मदेव देखि महाकाली किनार हुँदै डडेलधुराको परशुराम नगरपालिका, भागेश्वर गाउँपालिका, बैतडीको शिवनाथ गाउँपालिका, पञ्चेश्वर गाउँपालिका, दशरथचन्द नगरपालिका, दोगडाकेदार गाउँपालिका र दार्चुलाको लेकम गाउँपालिका, मालिकार्जुन गाउँपालिका, महाकाली नगरपालिका, दुहुँ गाउँपालिका हुँदै ब्यास गाउँपालिकाको टिङ्कर नाकासम्म छोएको बताईएको छ ।
