कार्तिक १७ कञ्चनपुर । कञ्चनपुरमा यस वर्ष धान उत्पादनमा वृद्धि भएको छ । कृषि ज्ञान केन्द्र कञ्चनपुरका अनुसार गत वर्षको तुलनामा यस वर्ष धानको उत्पादनमा वृद्धि भएको हो ।
कृषि ज्ञान केन्द्र कञ्चनपुरका सूचना अधिकारी धर्मबहादुर साउदले उत्पादकत्व शून्य दशमलव दुई प्रतिशतले बढेको जानकारी गराए । यस वर्ष गत वर्षको तुलनामा धानको उत्पादकत्वमा वृद्धि भएको बताउदै उनले उन्नत जातको बीउबिजन र सिँचाइ सुविधाका कारण उत्पादनमा वृद्धि भएको बताए ।
यस वर्ष दुई लाख तीन हजार छ सय ८३ मेट्रिक टन धान उत्पादन भएको उनले बताए । गत वर्ष एक लाख ९३ हजार ९ सय ८४ मेट्रिक टन उत्पादन भएको बताउदै कृषि ज्ञान केन्द्रले किसानलाई अनुदानमा सिचाँइ सुविधा उपलब्ध नभएको ठाउँमा साना सिचाँइ जडान समेत गर्ने गरेको बताए ।
सूचना अधिकारी साउदले गत वर्ष ज्ञान केन्द्रले नौवटा स्थानीय तहमा ७ सय ७६ साना सिचाँइ (ट्युवेल) जडान गरेको जानकारी गराए । कञ्चनपुरमा ४८ हजार ४ सय ९६ हेक्टर क्षेत्रफलमा धानखेती हुने गरेको बताउदै उनले त्यसमध्ये ३९ हजार ६ सय ५० हेक्टर क्षेत्रफलमा सिँचाइ सुविधा उपलब्ध हँुदै आएको बताए ।
हाल साना सिँचाइ बाहेक महाकाली सिँचाइ आयोजना पहिलो र दोस्रो चरणबाट ११ हजार ६ सय हेक्टर क्षेत्रफलमा सिँचाइ सुविधा उपलब्ध भएको उनले बताए ।
विसं २०४२ सालमा सुरु भई ०४८ सालमा सम्पन्न भएको महाकाली सिँचाइ पहिलो चरणबाट चार हजार ८ सय हेक्टर र ०५२ सालमा सम्पन्न भएको दोस्रो चरणबाट छ हजार ८ सय हेक्टर क्षेत्रमा सिँचाइ सुविधा पुगेको उनले बताए ।
पहिलो र दोस्रो चरणको सिँचाइबाट भीमदत्त, बेदकोट नगरपालिका र बेलडाँडी गाउँपालिकासम्म सिँचाइ सुविधा उपलब्ध भएको उनले बताए । समयमा रासायनिक मल पाउन सके धान उत्पादन अझै बढ्न सक्ने किसानहरूले बताएका छन ।
बेदकोट नगरपालिका वडा नम्बर–९ सुन्दरपुरका किसान सागर रानाले यस वर्ष धानखेतीको समयमा आकाशेपानी पर्दा धान उत्पादन राम्रो भएको बताए । उनले विगतका वर्षमा बोरिङबाट रोपाइँ गर्ने गरिएको बताउदै यस वर्ष आकाशेपानी समयमा आउँदा बोरिङको प्रयोग गर्नु नपरेको बताए ।
अर्का किसान खुसी डगौराले आकाशेपानी र समयमै मलखाद उपलब्ध भएकाले धान उत्पादन वृद्धि भएको बताईन ।
