कार्तिक १७ दार्चुला । दार्चुलाको सदरमुकाम खलङ्गामा रहेको महाकाली नगरपालिकाको भवन नौ वर्ष सम्म पनि बन्न सकेको छैन ।
दुई वटा नगरपालिका र सात वटा गाउँपालिका गरी नौ वटा स्थानीय तहमध्ये सदरमुकाम खलङ्गामा रहेको महाकाली नगरपालिकाको भवन नौ वर्ष सम्म पनि बन्न नसकेको हो ।
शैल्यशिखर नगरपालिका र मालिकार्जुन गाउँपालिकाको भवन निर्माणाधीन अवस्थामा छन् भने बाँकी छ वटा गाउँपालिकाले भवन निर्माण गरेर कार्यालय समेत सञ्चालन गरिसकेका छन् ।
गाउँपालिका स्थापनाकै वर्ष २०७४ सालमा नौगाड गाउँपालिकाले पहिलो पटक आफ्नै भवन निर्माण गरेको थियो भने पछि विस्तारै अन्य स्थानीय तहले समेत आफ्नै भवन निर्माण गरेको अवस्था छ ।
सदरमुकाम खलङ्गामा रहेको महाकाली नगरपालिका हाल निजामती कर्मचारी आवासको भवनबाट सञ्चालनमा रहेको छ । २०७५ सालमा पाँच वर्षका लागि आवासको भवन प्रशासकीय भवन सञ्चालनका लागि नगरपालिकाले लिने सम्झौता गरेको थियो ।
सम्झौताको म्याद २०८० भदौमा सकिए पछि त्यसयता थप एक वर्षका लागि म्याद थप गरिएको निजामती कर्मचारीको आधिकारिक ट्रेड युनियन दार्चुलाका अध्यक्ष रघुवीरसिंह ठगुन्नाले जानकारी गराए ।
थप गरिएको एक वर्षको म्याद २०८१ भदौ २३ गते सकिएको भए पनि नगरपालिका सोही भवन मार्फत सञ्चालनमा रहेको छ । नगरपालिका स्थापना भएको नौ वर्ष बितिसक्दा समेत आफ्नै भवन निर्माण गर्न नसक्नु दुःखद भएको स्थानीयले बताएका छन् ।
नगर उपप्रमुख दुर्गाकुमारी खत्री विष्टले जग्गा उपलब्ध नहुँदा भवन निर्माण गर्न नसकिएको बताए । भवनको डिपिआर तयार गरेको बताउदै उनले जग्गा उपलब्ध हुनेबित्तिकै निर्माण कार्यको थालनी हुने बताए ।
