भदौ ३० धनगढी । भदौ २४ गतेको आन्दोलनका क्रममा सुदूरपश्चिम प्रदेशका सरकारी कार्यालयबाट लुटिएका र चोरिएका सामानहरु फिर्ता नगरे प्रहरीले कारबाही गर्ने भएको छ ।
प्रहरीले सार्वजनिक सूचना जारी गर्दै फिर्ता गर्न अपिल गरेपछि कैलालीका सरकारी कार्यालयबाट चोरिएका सामाग्रीहरु फिर्ता हुन थालेका भए पनि सामानहरु फिर्ता नगरे प्रहरीले कारबाही गर्ने भएको हो ।
जेनजी युवाहरुले भदौ २३ र २४ गते गरेको विरोध प्रदर्शनका क्रममा चोरी गरिएका सामान नकिन्न पनि व्यापारीहरूलाई प्रहरीले अपिल गरेको छ । सूक्ष्म रूपमा अनुसन्धान भइरहेको भन्दै त्यस्ता सामान कुनै पनि व्यापारीलाई खरिद तथा बिक्री नगर्न नगराउन र सो सम्बन्धमा कुनै सूचना प्राप्त भएमा नजिकको सुरक्षा निकायलाई जानकारी गराउन समेत अनुरोध गरिएको छ ।
भदौ २४ गते भएको आन्दोलनका क्रममा भएको तोडफोड र आगजनी पछि चोरी गरिएका सामानहरु फिर्ता गर्न थालिएको छ । जिल्ला प्रशासन कार्यालय र सुदूरपश्चिम प्रदेश प्रहरी कार्यालय कैलालीले सर्वसाधारणलाई तोडफोड र आगजनीको क्रममा सरकारी कार्यालय तथा निजी घर तथा पसलबाट लगिएको सामान फिर्ता गर्न अपिल गरेछि सामानहरु फिर्ता आउन थालेका हुन् ।
जिल्ला प्रशासन कार्यालय कैलालीको गेटमा सामान बुझ्न सशस्त्र प्रहरीलाई खटाइएको छ । हालसम्म ६ थान दराज, १२ थान अफिस कुर्सी, एक सेट सोफा, कम्प्युटर टेबुल, फाइल राख्ने ¥र्याक लगायतका सामान फिर्ता गरिएको छ ।
आन्दोलनका क्रममा प्रदेशमा विभिन्न सरकारी कार्यालयहरूमा तोडफोड तथा आगजनी गरे पश्चात ती कार्यालयहरूमा रहेका कम्प्युटर, प्रिन्टर, ल्यापटप, दराज, कुर्सी, टेबल, पङ्खा, एसी, ब्याट्री लगायतका जिन्सी, बहुमूल्य वस्तु तथा सराकारी माल समानहरू चोरी तथा लुटपाट गरी बजारमा खरिद बिक्री भईरहेको प्रहरीले जनाएको छ ।
प्रहरीले चोरी वा आवेशमा लिएर घरमा राखिएका सामानहरू स्वेच्छाले बुझाउनेलाई उचित सम्मान गरिने जनाएको छ । तर नबुझाई आफैँसँग राख्ने वा खरिद–बिक्री गर्ने माथि प्रचलित कानुन अनुसार कारबाही हुने प्रहरीले चेतावनी दिएको छ ।
