भदौ ०५ धनगढी । हुलाकी सडक आयोजना अन्तर्गत बन्न लागेका पाँच वटा पुल निर्माणमा बजेटको अभाव भएको छ । हुलाकी सडक आयोजना कार्यालयका अनुसार पाँच वटा पुल निर्माणमा बजेटको अभाव भएको हो ।
धनगढीमा दुई वटा पुल तोकिएको म्यादमा निर्माण सम्पन्न हुन नसक्दा पुल निर्माण सम्पन्न गर्ने म्याद दुई वर्ष थप गरिएको छ । पुलको ६५ प्रतिशत मात्रै भौतिक प्रगति भएको हुलाकी सडक आयोजना कार्यालयले जनाएको छ ।
धनगढी उपमहानगरपालिका वडा नम्बर–१ र २ जोड्ने र वडा नम्बरं १ र ८ जोड्ने खोलामा २५÷२५ मिटर लम्बाइका दुई वटा पुल ३० महिनामा सम्पन्न गर्ने गरी २०७८ फागुन १९ गते ३० आठ करोड २३ लाख ७३ हजारमा मालिका निर्माण सेवा प्रालिसँग सम्झौता भएको थियो ।
सुरुमा निर्माण कम्पनीले ढिलाइ गरेको र पछिल्ला वर्षमा बजेट अभावका कारण पुल निर्माणमा ढिलाइ भएको हुलाकी सडक आयोजना कार्यालय धनगढीले जनाएको छ ।
त्यसैगरी, कञ्चनपुरको पुनर्वास नगरपालिकामा पर्ने डोण्डा नदीमा पुल बनाउन २०७९ असार ५ गते शान्ति निर्माण सेवा प्रालिसँग २०८२ पुस गते सम्पन्न गर्ने गरी ३३ करोड ५५ लाख ३३ हजारमा ठेक्का सम्झौता भएको थियो ।
तीन वर्षमा पुलको दुई पिलर हाल्ने काम मात्रै भएको छ । पुलको ३० प्रतिशत मात्रै भौतिक प्रगति भएको आयोजना कार्यालयले जनाएको छ ।
त्यसैगरी कञ्चनपुरको बेलौरी–दैजी खण्डको टिसिएन खोलामा आरसिसि बक्स कल्भर्ट बनाउने ठेक्का पाएको मालिका निर्माण सेवाले तीन करोड १२ लाख ६९ हजारमा २०८० वैशाख १७ गते ठेक्का सम्झौता गरेकोमा ९० प्रतिशत काम सम्पन्न गरेको छ ।
कञ्चनपुरकै अम्खोइया खोलामा आरसिसी बक्स कल्भर्ट निर्माणका लागि २०८० साउन १ गते नीरज भौनेली श्रीयाज जेभीसँग तीन करोड २७ लाख ७६ ठेक्का लिएकोमा ७० प्रतिशत काम सम्पन्न भएको छ ।
ठेक्काको सुरु म्याद २०८१ असोज ३० गते सकिएको कार्यालयले जानकारी गराएको छ । निर्माणाधीन पुलको ठेक्काका लागि थप गरिएको म्याद पनि असारमा सकिएको आयोजना कार्यालय धनगढीका इञ्जिनियर रमेश पन्तले जानकारी गराए ।
