भदौ ०५ धनगढी । सुदूरपश्चिम प्रदेशको प्रसिद्ध धार्मिक पर्यटकीय स्थल बडिमालिकाको विकासका लागि कार्यदल गठन गरिने भएको छ ।
बडिमालिकामा पूर्वाधार विकास तथा प्रवर्धन सम्बन्धी कार्ययोजना तयार गर्न कार्यदल गठन गरिने भएको हो ।
सुदूरपश्चिम प्रदेशका मुख्यमन्त्री कमल बहादुर शाहको प्रमुख आतिथ्यतामा मुख्यमन्त्री तथा मन्त्रीपरिषद् कार्यालयमा भएको बडिमालिका क्षेत्रको पर्यटन विकासका क्रियाकलापहरूको आगामी कार्यदिशा सम्बन्धि छलफलमा कार्यदल गठन गरिने जानकारी गराईएको हो ।
बडिमालिकामा पूर्वाधार विकास तथा प्रवर्धन गर्न हालसम्म भएका कार्यको अध्ययन र समीक्षा गर्न आवश्यक रहेको मुख्यमन्त्री शाहले बताए ।
उनले बडिमालिकाको विकास एवम् प्रवर्धनका लागि तत्काल र दिर्घकालिन रुपमा गरिने कार्यहरूको कार्ययोजना तयार गर्न कार्यदल गठन गरिने जानकारी गराएका हुन ।
मुख्यमन्त्री शाहले यसअघि उद्योग,पर्यटन, वन तथा वातावरण मन्त्रालयलाई बडिमालिका मन्दिर क्षेत्रमा प्राविधिक टोली खटाउन र आवश्यक संरचना निर्माणको थालनी गर्न निर्देशन दिई सकेका छन् ।
