भदौ ०३ बाजुरा । बाजुराको हिमाली गाउँपालिकाका बाढीपहिरो पीडितलाई राहत वितरण गरिएको छ ।
शुक्रबार हिमाली गाउँपालिकाले बाढीपहिरोले गाँसबासको समस्यामा परेका स्थानीयलाई खाद्यान्न, भाँडाबर्तन र त्रिपाल लगायतका राहत सामग्री वितरण गरेको हो ।
गत बुधबार राति बिच्छ्या खोलामाथिबाट आएको बाढी सिधै गाउँ पसेपछि घर, जमिन र खाद्यान्न लगायत सबै बगाए पछि स्थानीय पीडित बनेका छन् ।
यो बेला हिमाली गाउँपालिकाले चामल, नुन, तेल र भाँडा, त्रिपाल वितरण गरेपछि अहिले केही दिनका लागि भए पनि बिहान बेलुकीको छाक टार्न सहज भएको हिमाली गाउपालीका वडा नम्बर–१,बिच्छ्याका सब्बले थापाले बताए ।
हिमाली गाउँपालिकाका अध्यक्ष गोविन्दबहादुर मल्लले बाढीपहिरोले हिमाली गाउँपालिका वडा नम्बर–१, बिच्छ्यामा आठ घर बगाएको बताउदै नौ घर पूर्ण जोखिमा रहेको बताए ।
४१ घरमा पूर्ण रूपमा क्षति पुगेको बताउदै उनले २४ घरपरिवार विस्थापित भएको बताए । वडा नम्बर ५कवाडीमा मात्र १६ घरपरिवार विस्थापित भएको बताउदै उनले ३२ वटा घरमा पूर्ण रूपमा क्षति पुगेको बताए ।
