भदौ ०३ बैतडी । बैतडीको पाटन नगरपालिका वडा नम्बर–२ स्थित सिद्धनाथ माध्यामीक विद्यालय सिलङ्गामा भवन जीर्ण हुँदा पठन पाठनमा समस्या भएको छ । विद्यालयको जीर्ण भवनमै कार्यालय र कक्षा सञ्चालन गर्नुपरेकाले पठन पाठनमा समस्या भएको हो ।
विद्यालयका प्रधानाध्यापक लक्ष्मण बोहराले कक्षा १२ सम्म पढाई हुने सिद्धनाथ माध्यामीक विद्यालय सिलङ्गामा १० कोठे पुरानो भवन र ६ कोठे नयाँ भवन रहेको बताए ।
नयाँ भवन पार्याप्त नभएका कारण विद्यालयको कार्यालय, कम्प्युटर ल्याब र कक्षाहरु पुरानो भवनमै सञ्चालन गर्नुपर्ने अवस्था रही आएको उनले जानकारी गराए । २०४२ सालतिर स्थानीयहरुले जनश्रमदानमा निर्माण गरेको भवन जीर्ण हुनुका साथै छानो चुहिने हुँदा समस्या भएको प्रधानाध्यापक बोहराले बताए ।
पत्थरले छाएको छानो बर्खाको समयमा चुहिने गरेको बताउदै उनले बर्खाको समयमा विद्यालयको छानो चुहिएपछि महत्वपूर्ण कागजात र दस्ताबेजहरु भिजेर नष्ट भएको बताए ।
अहिले विद्यालयको छानोमा प्लास्टिक हालेर काम चलाएको प्रधानाध्यापक बोहराले बताए । सिद्धनाथ मावि क्षेत्रकै पुरानो विद्यालय भएको बताउदै उनले भवन अभावमा धेरै समस्या भोग्नुपरेको बताए ।
जीर्ण भवन चुहेर महत्वपूर्ण कागजपत्र नष्ट भएको उनले बताए । विद्यालयमा भवन अभावका बिषयमा सरोकारवाला निकायलाई बारम्बार जानकारी गराउँदा समेत समस्या समाधान नभएको प्रधानाध्यापक बोहराले बताए ।
भवन अभावमा अन्य समस्याहरु समेत खेप्नुपरेको बताउदै उनले २००६ सालमा स्थापना भएको सिद्धनाथ मावि सिलङ्गामा अहिले ३ सय ९० जना विद्यार्थी अध्ययनरत रहेको जानकारी गराए ।
