भदौ ०२ धनगढी । भूमि समस्या समाधान आयोग कैलालीले लालपुर्जा वितरणको तयारी थालेको छ । आयोगले जिल्लाका विभिन्न पालिकामा लालपुर्जा वितरणको तयारी थालेको हो ।
भदौ मसान्त भित्र धनगढी उपमहानगरपालिका,गोदावरी नगरपालिका,लम्कीचुहा नगरपालिका, बर्दगोरिया र जानकी गाउँपालिकामा लालपुर्जा वितरण गर्ने तयारी भएको आयोगका अध्यक्ष यज्ञराज उपाध्यायले जानकारी दिए ।
पहिलो चरणमा जग्गा भोगचलन गरिरहेका भूमिहीन दलित र भूमिहीन सुकुम्बासीलाई पहिलो प्राथमितामा राखेको बताउदै उनले नापचाँजको काम लगभग सम्पन्न भएको बताए ।
पुर्जा बनाउने र पुनः प्रमाणीकरण गर्ने काम भइरहेको उनले बताए । आयोग र स्थानीय तहका कर्मचारी त्यसमा लागेको उनले बताए ।
जिल्लाका सबै पालिकामा आयोगले काम गरिरहेको बताउँदै उनले सीमित कर्मचारी र सीमित स्रोत साधनका बीच आयोगले कामलाई तीब्रता दिएको बताए ।
तीन वटा पालिकामा जग्गा नापजाँचको काम बाँकी रहेको र छिट्टै सम्पन्न हुने उनले बताए ।
आयोगमा जिल्लाका १३ वटै पालिकाका १ लाख ४० हजार ३ सय ५८ निवेदन दर्ता भएको उनले जानकारी गराए ।
अध्यक्ष उपाध्यायले भूमिहीन दलितका ७ हजार ६ सय ३१,भूमिहीन सुकुम्बासीका १३ हजार ९ सय १४ र अव्यवस्थित बसोबासीका १ लाख १८ हजार ८ सय १३ निवेदन आयोगमा प्रविष्टी भएको बताए ।
त्यस्तै, अघिल्लो आयोगका अपूरा कामको पूर्णता दिने अधिकार आयोगलाई भएको र अघिल्ला आयोग, कार्यदल,समितिका अपूरा ५ हजार २ सय १४ परिवारका फाइल प्रविष्टी गरिएको उनले बताए ।
