भदौ ०२ धागढी । इलाका प्रहरी कार्यालय मालाखेती कैलालीमा सय दिनमा १ सय २५ वटा मुद्दा दर्ता भएका छन् । इलाका प्रहरी कार्यालय मालाखेतीमा प्रहरी नायव उपरिक्षक रण बहादुर चन्दले कमान्ड सम्हालेको सय दिनको अवधिमा १ सय २५ वटा मुद्दा दर्ता भएका हुन ।

मुद्दामा ८० जना पुरुष र १० जना महिलालाई पक्राउ गरिएको छ । प्रहरी नायव उपरिक्षक चन्दले १ सय २५ मुद्दामध्ये १० वटा मुद्दा लागू औषधका दर्ता भएको बताए । उक्त मुद्दामा संलग्न १४ जनालाई पक्राउ गरिएको बताउदै उनले उक्त अवधिमा सार्वजनिक हित विरुद्धको कसुरका १८ वटा मुद्दा दर्ता गरिएकोमा २४ जनालाई पक्राउ गरिएको जानकारी गराए ।

उक्त अवधिमा जबरजस्ती करणीका ७ वटा र जबरजस्ती करणी उद्योगको १ वटा मुद्दा दर्ता भएको जानकारी गराउदै उनले ८ जनालाई पक्राउ गरेको जानकारी गराए । पछिल्लो सय दिनको अवधिमा सबैभन्दा बढी बैङ्किङ कसुरका मुद्दा दर्ता भएको जानकारी गराउदै उनले ३३ वटा मुद्दा दर्ता भएकोमा ५ जना पुरुष र ४ जना महिलालाई पक्राउ गरिएको जानकारी गराए ।

प्रहरीले चोरी मुद्दाका १४ जना आरोपीलाई पक्राउ गरेको जानकारी गराउदै उनले चोरीका ५ वटा मुद्दा दर्ता भएकोमा ११ जना महिला र ३ जना पुरुषलाई पक्राउ गरिएको जानकारी गराए । त्यसैगरी सवारी ज्यानका ५ वटा मुद्दामा ५ जना, बहु विवाहका ३ वटा मुद्दामा ३ जना पुरुष र ३ जना महिला गरी ६ जनालाई पक्रउ गरिएको उनले जानकारी गराए ।

त्यसैगरी सोही अबधीमा १५ जनाले आत्महत्या गरेको मुद्दा प्रहरीमा दर्ता भएको प्रहरी नायव उपरिक्षक चन्दले बताए । त्यैगरी बिस सेवन गरेका २ वटा, आत्महत्या दुरुत्साहनका २ वटा मुद्दा दर्ता भएको उनले बताए । आत्महत्या दुरुत्साहनका २ वटा मुद्दामा २ जनालाई पक्राउ गरेको बताउदै उनले मानव बेचबिखन तथा ओसार पसारको उएटा मुद्दा, फुटकर ज्यानका २ वटा मुद्दा, ज्यान मार्ने उद्योगका १ वटा मुद्दा दर्ता भएको बताए ।

मुद्दाका अभियुक्त पक्राउ नपरेको जानकारी गराउदै उनले कर्तव्य ज्यानको १ र ठगीका २ वटा मुद्दा दर्ता भएकोमा दुवै वटा मुद्दामा १÷१ जनालाई पक्राउ गरिएको बताए । त्यसैगरी जातीय विभेद तथा छुवाछूतको एउटा मुद्दामा १ जना, हातहतियार खरखजनाका २ वटा मुद्दामा २ जना र करेन्ट लागि अङ्गभङ्ग भएको १ मुद्दामा १ जनालाई पक्राउ गरिएको उनले जानकारी गराए ।

पछिल्लो सय दिनको अवधिमा पानीमा डुबेर भवितव्य ज्यान गुमाएका ७ जना, भवितव्य ज्यान गएका ५ जना र चट्याङ लागि भवितव्य ज्यान गुमाएका १ जना गरी १३ वटा मुद्दा दर्ता भएको चन्दले बताए । चन्दले आफ्नो सय दिनको कार्यकालमा ७७ लाख २१ हजार १ सय ५२ रुपैयाँ बराबरको अवैध सामान बरामद गरेको बताउदै भारतबाट भन्सार छली ल्याइएको उक्त सामान इलाका प्रहरी कार्यालय र मातहतका प्रहरी कार्यालयबाट बरामद गरिएको बताए ।

जेठ १५ गते ४२ लाख ३७ हजार ५ सयका मोबाइलका डिस्प्ले र अन्य पार्टपुर्जा, जेठ ८ गते ६० हजार ५ सयका सुट र कुर्ती, जेठ १७ गते २३ लाख ५ सयको कोट पाइन्टको कपडा, जेठ १९ गते ६ लाख ८ हजारको १६ टन फलाम र असार २० गते ७४ हजार ७ सय ६० रुपैयाँको कुती, सुट, कट्टु र छाता बरामद गरिएको चन्दले बताए ।

त्यसैगरी जेठ २७ गते ५६ हजार ६ सयको धोती, कुर्ती र भाइरल साडी, साउन ९ गते १ लाख १२ हजार ५ सयको ब्लाङ्केट, तन्ना र साउन २५ गते २ लाख ७० हजार ७५० रुपैयाँको सुट, साडी र मोटरसाइकल २ थान बरामद गरिएको प्रहरीले जनाएको
छ ।

चन्द वैशाख २२ गते ईलाका प्रहरी कार्यालय मालाखेतीमा सरुवा भएर आएका थिए । ईलाका प्रहरी कार्यालय मालाखेतीका प्रमुख प्रहरी नायव उपरिक्षक गंगा बहादुर थापाको सरुवा भएपछि सुदूरपश्चिम प्रदेश प्रहरी तालिम केन्द्र दिपायलमा कार्यरत चन्द इप्रका मालाखेतीमा सरुवा भएर आएका थिए ।