साउन ३० कञ्चनपुर । कञ्चनपुरको शुक्लाफाँटा नगरपालिकाको नगर गौरवको योजना चक्रपथको उत्तरतर्फको सडक खण्ड अन्तर्गत पर्ने वनसमिति–कसरौल सडक सुकेका रुखका कारण जोखिमपूर्ण बनेको छ । सडकको दायाँ, बायाँ सुकेका साल, असनाका रुख भएका कारण वनसमिति–कसरौल सडक जोखिमपूर्ण बनेको हो ।
गुडिरहेका सवारीसाधन र पैदलयात्रु माथि जुनसुकैबेला पनि रुखका हाँगा अथवा रुख खसेर दुर्घटना हुन सक्ने खतरा रहेको छ । स्थानीय रतनलाल रानाले सडकमा पैदल हिँड्दै गरेका स्थानीय ६० वर्षीय फिरुवा रानाको सुकेको रुखको हाँगा लागेर केही वर्ष अघि मृत्यु भएको बताए ।
विद्यार्थी बोकेर जाँदै गरेको स्थानीय विद्यालयको बसमाथि सुकेको रुख खसेको जानकारी गराउदै उनले बसमाथि रुख खसे पनि मानवीय क्षति भने केही नभएको उनले बताए । त्यसैगरी स्थानीय रामदिन रानाको गाई, गोरु बाँधेको गोठमाथि रुख खसेर गोठमा क्षति पुगे पनि बस्तुभाउ जोगिएको उनले जानकारी गराए ।
गत वर्षमात्रै दानु रानाको घरको कुना तोड्दै रुख खसेको बताउदै उनले धन्न घर र घरभित्रै रहेका परिवारका सदस्य जोगीएको बताए । सुकेका रुखका कारण दुर्घटना निम्तिन थालेपछि सडकमा हिँड्न डराउनु पर्ने अवस्था रहेको उनले बताए । पुराना सुकेका जीर्ण भएका रुख जुनसुकै बेला पनि खस्न सक्ने भएकाले हटाउनु पर्ने पूर्व वडाध्यक्ष जगता रानाले बताए ।
“विगतमा सुकेका रुखकै कारण मानवीय क्षति भइसकेको बताउदै उनले हावाहुरी चलेका बेला, चट्याङ परेका बेला र वर्षात्का बेला ज्यान हत्केलामा राखेर हिँड्नुपर्ने बाध्यता भएको बताए । जाने अर्को वैकल्पिक सडक नभएको बताउदै उनले जोखिम मोलेर हिँड्नुपरेको बताए ।
सडक छेउमा घर भएकाले कुनबेला रुख खसे। मरीने हो भन्ने चिन्ताले सताउने गरेको उनले बताए । स्थानीय जहरसिंह रानाले गाडी चल्ने बेला रुख खसेर दुर्घटना हुने सम्भावना भएको बताउदै पैदल यात्रुको टाउकामा कुनबेला रुखका हाँगा र रुख बजारिने हो कुनै पत्तो नभएको बताए ।
हावाहुरी चलेका बेला त्यो सडक भएर हिँड्नु भनेको ज्यान जोखिममा पार्नु भएको बताउदै उनले त्यही भएर वर्षात् र हावाहुरीका बेला त्यो सडक भएर हिँड्न छाडेको बताए । सडक छेउका जीर्ण रुख व्यवस्थापन गरिदिनका लागि माग गरेको भए पनि सुनुवाई नभएको उनले बताए ।
वनसमिति देखि कसरौल सम्मको डेढ किलोमिटर सडक कालो पत्रका लागि पूर्वाधार विकास कार्यालयले तीन करोडमा ठेक्का सम्झौता गरेको शुक्लाफाँटा नगरपालिकाका इञ्जिनियर दिपक धाँमीले बताए । सुकेका जीर्ण रुख व्यवस्थापन नभई कार्य सञ्चालन गर्न कठिन भएको बताउदै उनले सडक स्तरोन्नति देखि कालोपत्र सम्मका लागि वातावरण अध्ययन र डिपिआर निर्माणको कार्य भएको बताए ।
सुकेका रुख काट्ने अनुमति अहिले सम्म नपाएको बताउदै उनले अनुमतिका लागि नगरपालिकाले पहल गरिरहेको जानकारी गराए । शुक्लाफाँटा राष्ट्रिय निकुञ्जको मध्यवर्ती क्षेत्र भएकाले निकुञ्ज सम्बद्ध मन्त्रालयसँग कटानी आदेशका लागि पत्राचार गरिएको उनले जानकारी गराए ।
वडाध्यक्ष दानसिंह ऐरले वनसमिति–कसरौल सडक वडा नम्बरं ६, ७ र ८ तर्फ जाने मुख्य सडक भएको बताए । वडा कार्यालय, स्वास्थ्य चौकी र खानेपानी लगायत कार्यालय जाने मुख्य सडक पनि त्यही भएको उनले बताए । सुकेका रुख व्यवस्थापनका लागि निकुञ्जसँग समन्वय गरेको बताउदै उनले वन मन्त्रालयको टोलीले त्यस क्षेत्रको स्थलगत अवलोकन गरिसकेको बताए ।
समस्या लिएर मन्त्रालय सम्म पुगेको बताउदै उनले सडक छेउका १ सय ५ रुख हटाउनु पर्ने देखिएको बताए । त्यसका लागि प्रारम्भिक वातावरणीय परीक्षणका लागि निकुञ्ज कार्यालयले स्थलगत प्रतिवेदन तयार गरी सम्बन्धित निकायमा पेश गरेको उनले जानकारी गराए ।
